SPAOH: Sepenyampau 2,000 iku anak manuk udah disua ngagai 23 penerima nengah Program Nyungkak Ekonomi Nengah Pengawa Nupi Anak Kunsil Nengeri (DUN) Bukit Saban Renggat 6/2026 ti diatur Palan Servis Kaban Kunsil Nengeri (ADUN) Bukit Saban, empai lama.
Program ti diatur nengah inisiatif Sapit Premier Sarawak ti mega ADUN Bukit Saban, Datuk Amar Douglas Uggah Embas ngembuan tuju dikena mantu peranak nambah penatai pemisi tambah nengah pengawa nupi manuk seraya meransang komuniti ngambi bagi ba dagang ti ulih nambah penatai pemisi ruang bilik.
Ku Uggah, bantu ti diberi tu ukai semina nyendia puku ngepun pengawa aja, tang mega meransang penerima nambah pun penatai pemisi chara berenggat nengah pengawa ti manah agi.
“Aku ngarap tetiap penerima ngena bantu tu enggau naka pemanah laban enti dipejalai bebendar sereta konsisten, dagang ti bepun ari chara mit tu ulih mansang nyadi pun penatai pemisi ti meri pemaik ngagai ruang bilik,” terang iya.
Iya madah, perintah deka seruran ngerembai atur program ti meri pemaik ngagai rayat, kelebih agi inisiatif ti ulih nambah penatai pemisi peranak menua pesisir sereta ngemansang ekonomi ruang bilik nengah pengawa ti dipejalai sida empu.
“Pekara ke pemadu beguna iya nya pengeran ngerembai bantu ti diterima tu.
“Aku andal nengah pengeransing, mayuh agi peranak ulih ngubah tikas idup nengah dagang ti dikemansang sida empu,” ku iya nyemetak.
Kenyau ari taun 2023, inisiatif bantu anak manuk ba DUN Bukit Saban tu udah meri pemaik ngagai 1,200 penerima nengah pengawa nyua manggai 60,000 anak manuk ti dipejalai Palan Servis ADUN Bukit saban lalu disukung Ejensi Pemansang Bagi Menua Betong (BDDA).
Pejalai projek nya ngayanka inisiatif perintah nambah peluang ekonomi ngagai peranak menua pesisir nengah chara ti muntang dikereja.
