KAPIT: Bantu bekal pemakai terus diagih ngagai rayat menua pesisir enggau menua ulu dikena ngurangka penusah sekumbang Atur Tagang Pejalai (PKP).
Kaban Parlimen Kapit Datuk Alexander Nanta Linggi madahka naka kemari, bisi 1,226 bantu barang pemakai udah diagihka ngagai rayat ba sitak Kapit.
Ku iya, penyampau 213 bungkus bantu barang pemakai udah diagihka ngagai sitak Kapit enggau Pelagus, kemari.
“Agih tu sebagi ari bantu pengasih ari Perintah Besai enggau Perintah Sarawak.
“Bantu tu deka seruran diagihka nitih renggat ngagai genap genturung menua lalu piak kami deka bebendar agi ngerumban bantu tu datai ba rayat,” ku iya madah ba siti penerang facebook iya, tadi.
Entara rumah panjai ba dua sitak nya ke nerima bantu kemari iya nya Rumah Mary Balan (64 bungkus), Rumah Paul Lenggang (39 bungkus), Rumah Nyawai (18 bungkus), Rumah Taing (24 bungkus), Rumah Mikai (27 bungkus), Rumah Minggat (20 bungkus) enggau Rumah Ukau (21 bungkus).
Nanta mega ngarapka rayat seruran meri kerejasama ngambika ngemuntang pengawa meri bantu.
Rambau pengawa meri bantu nya, Pemesai Palan Servis Dun Pelagus Franckconero Jeffry begulai enggau raban volunter ke bukai mantu ngemuntangka pengawa ngagihka bantu ngagai genap rumah panjai ke nerima.
Pengawa ngagihka bantu nya mega dibantu sereta dipatau Komiti Penyangga Penusah Ngenyit Bagi Menua begulai enggau Palan Servis Pengari Rayat Pelagus enggau Kapit.
Nanta ngelalau rayat kelebih agi ba sitak nya ngambika seruran nyaga pengerai enggau pemeresi diri sereta nitihka atur PKP.
