SRI AMAN: Ba tengah gaya besejarah Muzium Pesaka Kubu Alice, siti baya tanah ti nyau deka beumur 100 taun terus nyadi saksi pemesai budaya pengawa betanam betupi komuniti Iban.
Siku pemantu galeri, Sopoin Dony, 29, nyemetak madah, baya tanah nya besai bendar reti ba komuniti Iban ti dikumbai pemali umai.
Iya madah, baya tanah nya nyadi lambang pengawa nyaga asil kebun ba adat lama komuniti nya. “Baya tanah nya diulih ari siti rumah panjai lama di pelilih Engkilili lalu dipechaya beumur lebih 80 taun.
“Komuniti Iban ngaga baya tanah nya rambau musin bumai dikena nyaga padi ari jelu siga baka chit enggau indu utai,” terang iya.
Tampung iya, baya tanah nya dipandang ngena penteba lama iya nya siku baya lelaki enggau pemanjai empat meter lalu mata iya digaga ari mangkuk tanah mit sereta tisik iya diias ngena kerimpak periuk tanah.
“Gaya tusun baya tanah tu chukup ikonik iya nya baya lelaki diengkah muak ke kanan lalu baya indu sepiak kiba seraya nunga mata panas ayan ti ngelambang penyemela kuasa tanah,” ku iya.
Terang Sopoin, kelimpah dikena nyaga utai tanam,baya tanah nya mandang kaul rat komuniti Iban enggau rampa menua.
Ku iya, pengawa mali umai ukai semina pengawa adat aja tang siti komunikasyen spiritual. Iya mega madah kediri irau tradisyen nya majak punas laban tebalagi rebak biak ti nemuai kia enda nemu tuju baya tanah nya digaga.
Tebal agi rebak biak, ku iya, tekenyit lebuh nemu pangku pengawa baya tanah nya ba budaya aki ini sida kelia. Ungkup inisiatif nyaga pemeruan pesaka nya, Muzium Pesaka Kubu Alice diatu bisi ngaga pemansang interaktif enggau sesyen becherita ngagai pengusung.
“Kami deka rebak biak ukai semina meda baya tanah tu nyadi siti artifak berega aja tang mereti ke falsafah ba belakang artifak tu iya nya kaul mensia, rampa menua enggau pekara spiritual,” ku iya nyemetak.
Iya ngarap komuniti lokal terus nyukung inisiatif nyaga pesaka baya tanah nya ti mandang pengangkun komuniti lokal nyaga penyemela ekosistem.
“Enti kitai terus neju pekara tu, kita ukai semina lenyau budaya tang elemen ti nempa identiti kitai,” tandu iya. – RJ
