Begau, pala baya nyenguk dapur

SARIKEI: Penatai temuai enda disadang, siku baya panjai tiga meter ngemegauka bala ti nguan sebuah rumah di Jalai Baji ditu, kemari.

Pekara nya nyadi urung 9.20 malam, ditemu siku ari orang ti nguan rumah nya lebuh ba dapur.

Ketua Balai Bomba enggau Penyelamat Sarikei, Mahmuddin Narudin madah, terubah iya orang nya meda utai panjai sereta besai enda jauh ari dapur sida.

“Enda nyamai ati enggau nama ti dipeda dia iya ngelawa utai ti bechura chelum nya. Dia iya tekenyit lebuh nemu nya siku baya,” ku iya lebuh ditelefon kemari.

Mahmuddin madah, lelaki nya lalu jampat ngagauka Bomba ngulihka bantu.

Nangkan nya, semilan iku raban Bomba enggau Penyelamat ti diketuai Pemesai Bomba Kanan ll, Haron Jenai begaut ke palan nya.

“Maya datai ngagai palan rumah nya kami meda siku baya panjai tiga meter enda jauh ari rumah orang ti ngaga ripot.

“Kami bisi nguji nangkap tang iya bisi mindah ari rumah nya sebedau ngelarika diri ngagai sungai enda jauh ari rumah nya,” ku iya.

Nitihka ripot orang ti nguan rumah nya, sida selalu tepedaka baya laban rumah sida enda jauh ari sungai.

“Taja pia, malam tadi jelu nya dipeda kelalu dampih enggau dapur rumah sereta ngemegauka sida ti diau dia.

“Enggau nya, aku ngelalau mensia mayuh ke besemak sungai anang enda bejimat enggau penatai jelu tu,” ku iya nambah.

NYENGUK DAPUR…Siku baya ti ngemegauka mensia mayuh di Jalai Baji.

 

BEJIMAT…Raban Bomba matau kandang rumah nya sebedau pulai.