BINTULU: Perintah Sarawak deka nirika sebuah begunan sementara ngambi ulih nangkup penyampau tubuh pesakit raya ba Sepital Bintulu.

Kepala Menteri Datuk Patinggi Abang Johari Tun Openg madahka bala pesakit nya nyengkaum pesakit Covid-19.

Ku iya, sepital menua nya begunaka begunan tambah laban sida mega nerima pesakit luar baka ari Mukah, Dalat enggau Belaga.

“Begunan tu ila deka didirika ba laman Sepital Bintulu ditu empu ngena Sistem Berumah Industri (IBS).

“Aku ngarapka pemisi begunan tambah tu ila ulih meri servis pengerai ke meruan agi ngagai bala pesakit enggau staf ke gawa ditu deka lantang bejalaika pengawa sida,” ku iya.

Abang Johari mansutka jaku nya pengudah mendingka penerang khas pasal gaya pandemik Covid-19 di Bintulu tadi.
Iya madah, ungkus ngaga begunan sementara nya benung diperundingka Perintah Sarawak enggau Opis Pengerai Nengeri Sarawak nyengkaum pemayuh katil deka disedia dia ila.