Bejimat nerima kangau ari orang enda dikelala

“Anang enda bejimat nyema bisi nerima kanggau ari lumur telefon ti enda dikelala lalu madahka penatai diri ari ejensi-ejensi perintah.”

SARATOK: Mensia mayuh lebih peranak ditu ditangkan ngambika seruran bejimat nyema bisi nerima kanggau telefon ti madah diri ari ejensi-ejensi perintah.

Ketuai Indu Opis Polis Saratok DSP Mordani Tanin madah, kemaya hari tu mayuh kes nipu digaga nengah kanggau telefon.

“Anang enda bejimat nyema bisi nerima kanggau ari lumur telefon ti enda dikelala lalu madahka penatai diri ari ejensi-ejensi perintah.”

“Anang sesekali mudah pechaya nyema bisi nerima kanggau ari orang ti madah diri ari ejensi perintah baka Polis,Imigresin, kort enggau ejensi ti bukai.”

“PDRM ambi ke chunto, nadai kala betelefon ngagai sebarang orang lalu ngasuh sida nepu duit akaun sebarang orang nyema orang nya tadi bisi penyalah tauka ngelanggar undang-undang (Saman).”

“Kebendar nya semina siti ari ‘modus operandi’ orang ti deka nipu (scammer) ti benung sereta majak nyadi ba dunya jeman diatu,”ku iya madah ngagai pemberita pengudah abis Program Polis Begulai Enggau Rayat ba Rh.Mudit Numpang,Lubok Lidong,Kaki Wong ditu, ensana.

Nambah nya ku iya, mensia mayuh tau mega ngelawa opis polis tauka piak ejensi bekaul ngenuku sesebengkah kangau telefon ari orang ti enda dikelala.

“Naka tu, apin bisi kes baka tu udah nyadi ba pelilih Saratok.”

“Tang penusah tu (Macau Scam) benung sereta balat nyadi ba menggeri besai lalu nadai salah mega enti kitai sama bela bejimat lalu beratika pekara tu,”ku iya.

Kelimpah ari Macau Scam, mayuh macham nama dikena bala pengelakar tu nipu orang baka Love Scam,Nyali Belanja (Pinjaman tidak wujud) enggau ‘Keldai Akaun’ lalu modus operandi sida tu nyauka sebaka magang iya nya minta siku-siku orang nepu sepenyampau duit ngagai lumur akaun bank ti diberi sida.

“Ketebal agi chara (modus operandi) sida tu iya nya ngasuh orang ngemasukka duit ngagai lumur akaun bank ke diberi sida iya (penipu).”

“Lalu kebuah kitai meseti ngemasuk ke duit,kenu ku sida iya dikena kitai mayar panjar tauka ‘Stamp Duty’ siti-siti peminta ti ditengkebang sida iya ungkup kitai nya tadi awak ke peminta nya ulih diputar enggau lengkas,” ku iya.

Program Community Policing tu keterubah iya diatur Indu Opis Polis Saratok ba taun 2020 sereta nerima timbal chukup manah ari mensia mayuh besemak kelimpah ba program tu mega mensia mayuh bepeluang ngenataika tanya sida ngagai piak polis ungkup pekara bekaul enggau pengawa jai.