SIBU: Penanggul nadai internet nadai nekul bala nembiak sekula ari rumah panjai Panggau di Sri Aman nembuka kereja sekula ke diberi pengajar sida nengah on-line tauka aplikasyen WhatApps.
Pengeransing sida tu dikunsi nengah Facebook alai sebengkah raban ke ngelar diri Projek Pensel bisi ngetu ngemataka pengawa bala nembiak ti ngulihka arus internet ba sebengkah kebun sawit, empai lama.
“Sida milih belajar ba kebun sawit laban semina dia aja endur ke bisi arus internet.
“Sida (nembiak) nembuka kerja sekula ke diberi pengajar nengah on-line,” pia ku penerang ari video ke dikunsi ba Facebook, lemai ensana.
Ba video nya, Projek Pensel nyaup nirika ‘kanopi’ ngambika bala nembiak lantang agi belajar.
Kelimpah ari nya, raban tu mega bisi nyendiaka mija enggau bangku ngagai bala nembiak ketegal sinu sebedau nembiak semina belajar beselapka tikai aja.
Bisi dipeda mega bala sida ke tuai dalam video ti dipelabaka nguluka bala nembiak belajar.
Atur belajar di rumah tauka belajar nengah internet bisi digerah Menteri Besai Tan Sri Muhyiddin Yassin dulu agi ari tu.
Muhyiddin ba jaku iya madah minta minta Opis Pelajar bejalaika inisiatif ‘home-base learning’ sepemanjai timpuh Atur Tagang Pejalai (PKP) diteritka nyengkaum renggat kedua nyentuk 28 April tu.
Sekula dipelabaka deka dibuka baru nyema pengerekai COVID-19 ditemu silik punas kelimpah laun agi dibuka ari pengawa ke bukai taja PKP enda diatur agi ila.
