KUCHING: Kimpin Nagang Rabies deka diatur kena 12 April tu ila berengkah ari pukul 8.30 pagi nyentuk 4.30 lemai di Balai Komuniti, Jalai Padungan.
Rabies iya nya siti igi penyakit ti munuh sereta ulih ngerampit jelu enggau mensia tang ulih ditagang nengah pengawa meri vaksin lengkas.
Nya alai, Gerempung Komuniti Sarawak Nagang Pengawa Menyati Jelu (SSPCA), Gerempung Veterinari Sarawak (SVA), Opis Pengerai Bagi Menua Kuching enggau Unit Komunikasi Awam Sarawak (UKAS) madah ke pengawa meri vaksin pechuma deka diatur serimbai kimpin nya.
Ba kimpin nya, Majlis Bandaraya Kuching Selatan (MBKS) bekerejasama enggau Opis Menteri Pengerai Mensia Mayuh, Pengawa Berumah enggau Perintah Lokal sereta Opis Servis Veterinar Sarawak (DVSS).
Kimpin nya mega mungkur pengawa meri vaksin pechuma ngagai mayau dikena nyikap pengawa ngatur Pet Walk 2025 ti deka diatur kena 27 April tu ila.
Siti serikat farmaseutikal, Boehringer Ingleheim nengah SSPCA enggau DVSS nyadi pemelanja sekeda vaksin ungkup mayau dikena nyikap jelu nya masuk program nya.
Nangkan nya, Datuk Bandar MBKS, Datuk Wee Hong Seng madah, siti kimpin deka diatur kena 12 April tu ila ti nyendia pengawa meri vaksin pechuma, lisin, masang microchip enggau servis steril bisi subsidi ungkup ukui ba sitak dipegai MBKS.
