Bemacham kraf jari bekualiti, jarang dipeda

Pengerami Borneo Kraf 2019

KUCHING: Mayuh bengkah produk bisi dijual ba palan eksibisyen ke dibuka beserimbai enggau Pengerami Borneo Kraf 2019 diatur Kraf Jari Malaysia bepalan ba Tebing Sungai Kuching berengkah 25 Oktoberi nyentuk 3 Nov tu.

Pengerami tu ukai semina mantu bala pedagang nambahka penatai pemisi tang mega nyadi platform endur mantaika produk ari menua tu ngagai temuai menua luar.

Siku temuai ari Sabah Mernney Michael, 21 madah program nya chukup manah laban bisi mantaika asil kraf ke ngembuan mayuh penatai.

“Kitai ulih meda mayuh bansa produk bisi dijual enggau rega ke patut sereta bemacham pendiau ke bebida ari bala pedagang,” ku iya.

Kenu ku Reymathi Nadarajan, 23 ti datai ari Negeri Sembilan, iya chukup rinduku kraf jari ke bisi dijual ditu.

TEMUAI LUAR…Jean Claude siku temuai ari Perancis ke bela limpang ngagai palan eksibisyen nya.

Ku iya, mayuh bansa barang ke nadai kala dipeda ditu lalu barang ke dijual mega enda bangat mar.

Jean Claude Puydebois, 76 madah iya chukup rinduka rantai tradisional ke bisi djual ba pengerami nya.

“Tu keterubah iya aku nemuai ke Sarawak lalu aku chukup rinduka barang kraf ke bisi dijual laban kualiti iya chukup manah sereta rega mega numbas iya,” ku iya.

Ali Golfetto, 32 ari Kanada madah kraf jari Sarawak ngembuan identiti kediri empu lalu nyelai enggau barang ba Kanada.

“Aku rinduka raga, beg sandik enggau semua jenis kraf jari tu laban ukai semina manah tang mega rega mega chukup nemban,” ku iya.

Pengatur program mega bisi ngatur mayuh bengkah aktiviti sepanjai pengerami tu nyengkaum eksibisyen produk baru, interaktif kraf, pengawa pemerindang enggau pekit ngiga reta tengkira.

Kitai ngarapka nengah program baka tu ulih nyungkak agi ekonomi menua sereta ngerembaika agi aktiviti dagang ba mata dunya.

LANDIK…Siku penenun pua ari Lubok Antu Davis Mering benung jenuh ngait kain sungkit.

 

MILIH KEDIRI…Sekeda produk kraf ke bisi dibantai nyerumba Pengerami Kraf Borneo Sarawak 2019 di Tebing Sungai Kuching.

Suara Sarawak