Berasai puang ngintu Gawai Dayak di mengeri

MIRI: Mayuh utai udah diperambu kena ngintu Gawai taun tu tang kategal penyakit covid-19 ti ngerekai serata dunya ngujungka Atur Tagang Pejalai (PKP) dipejalai ba menua kitai.

Peranak asal Kaki Wong, Krian Saratok, benama Angelia Bilun madahka diri temati kutu pengudah nemu diri tepekul ba mengeri ketegal penusah ke nuntung diatu.

Iya madah, Gawai taun tu enda baka ngintu Gawai taun ke udah berindik ari atur ke dipejalai kena ngerintaska rantai Covid-19 ari majak ngerekai.

“Enti ngelamatu, sebulan sebedau Gawai aku endang udah belabuh begagaka bemacham kek baka kek lapis, kuei enggau pemakai bukai.

“Abis nadai enam igi kek digaga aku kena begawai. Kuei enda kurang ari empat bansa tang diudar ari orang bukai laban serekat endur begagaka kuei ketegal gawa,” ku iya lebuh dirandau Suara Sarawak.

PEMAKAI ASAL… Entara pemakai dianti lebuh begawai pulai ke menua di Kaki Wong.

Ku Angelia tauka siru agi dikangau Indai Lamentan, sida menyanak endang ninting taun pulai ke menua di Kaki Wong, Krian ngintu Gawai Dayak.

Tang taun tu enda ulih pulai ke menua baka selama ketegal PKP, ti nagang mensia mayuh mindah ke bagi menua bukai enti nadai kebuah ke berat.

“Nya alai taun kira enda pulai ke menua lalu ngintu ba rumah diri empu aja. Nasip endar kami menyanak bisi magang ditu, semina enda ulih begempuru enggau bala menyadi sereta apai indai baka taun ke udah.

“Kira ka enda mayuh pengawa dikereja nyendiaka diri ngintu Gawai. Kek lapis ngaga sigi dua aja seraya nyangkung menyadi aku ke sama di Miri ditu.

“Pia mega pemakai baka lauk kira chukup empa diri sebilik laban endang nadai ngangauka orang bukai ngabang ke rumah. Sinu amat ati taun tu ngenang diri nadai serumpu makai baka selama.

“Tambah mega sinu laban nadai makai dagin jani menua guring kichap sereta asi ruas. Tu entara pemakai asal dianti lebuh pulai Gawai ke menua,” ku Angelia madahka penyinu ati iya.

Nambahka nya, taun tu berasai puang sereta sunyi laban nadai begempuru diri sebilik. Sinu ga ngenang apai indai di menua tetengapka bala anak, bala uchu ke enda pulai ngintu Gawai di menua, ku iya nambah.

Kelimpah ari nya ku iya, bekupaska kandang ngelingi rumah, meresi laman enggau dalam rumah endang dikereja sida menyanak baka selama.

“Semina taun tu kami duai Apai Lamentan nadai kiruh bebelika ai bisa enggau ai kordial. Ka meli gari bala anak enggau diri empu enda ga ulih. Kira ulih ngelimat belanja.

“Ngarapka kitai ulih ngintu Gawai enggau ati ransing taja pan dunya agi sigau jam ke diatu. Awak semengat Gawai nya idup.

“Ngena peluang tu, aku deka meri pesan selamat ngintu Gawai Dayak ngagai apai indai aku di Saratok, entua aku di Kuching, bala kaban belayan sereta bala bukai ke ngelala aku.

“Selamat Gawai Dayak, gayu guru gerai nyamai lantang senang nguan menua. Aram kitai besaup mutuska rantai Covid-19 tu lalu menua pulai lantang baka selama,” simpul Angelia.

RICHAH… Pejalai ngabang Gawai Dayak 2019 ari pintu ke pintu ba rumah panjai entua iya di Engkudu Atas, Saratok.