SIBU: Penyerakup dalam parti nyadi pun penegap pemadu besai nentuka Parti Rayat Sarawak (PRS) enggau Gempung Parti Sarawak (GPS) entap napi pemar politik diatu sereta nyikap diri napi Pengawa Bepilih Kaban Kunsil Nengeri (PRN) ti deka datai.
Tuai Nembiak PRS, Christopher Gira Sambang madah, semua kaban parti patut seruran negut semengat penyerakup enggau segulai sejalai nyadi siti tim nentuka parti meruan tegap sereta dikeandal ke rayat.
Gira mansutka jaku nya lebuh nyadi Mandal Tuai Pengatur Pengerami Mantar Gawai Dayak PRS 2026 ba Hotel Kingwood, lemai Hari Lima tu tadi.
Pengawa nya dipenyadi Presiden PRS, Datuk John Sikie Tayai ti mega bisi ngenatai pesan ngagai semua kaban parti ngambi seruran nyaga penyerakup enggau semangat begempung napi landskap politik kemaya hari tu.
Ku Gira, sulu jaku taun tu, Beserakup Mai Pengelantang, Nuju Pemansang mai besai reti ngagai semua kaban parti ngambi terus ngenegapka penyerakup sereta semengat begulai ba dunya politik diatu.
Iya nandu, PRS semina deka dipebasa enggau meruan enti semua kaban parti seruran beserakup sereta nyeliahka sebarang penyarut dalam parti.
“Lebuh kitai begulai, kitai dipebasa. Lebuh kitai pambar, parti kitai lemi. Kitai PRS kering laban ari kelia pechaya ke pangan diri,” ku iya.
Gira mega madah kediri nyukung jaku pesan Presiden PRS senentang penyerakup PRS enggau GPS ti nyadi pun penegap politik Sarawak ti patut seruran ditan.
Iya mega meri jamin Raban Nembiak deka nyadi sayap ti semampai ngembing penyerakup sereta ukai nyadi pun ti ngasuh parti pambar dudi hari.
Iya mega madah, raban nembiak diatu ukai semina nyadi rebak ke nganti pengawa ngiring, tang raban tu deka nentuka pemujur parti dudi hari enggau pemansang Sarawak.
Ku iya, pengawa bejalaika politik diatu mega udah berubah nunda pemansang dunya digital enggau media rama.
Nya alai, Raban Nembiak PRS patut landik ngena aplikasyen digital dikena ngenatai penerang ti betul ngagai rayat kelimpah nyaga nama parti ari petenah enggau penemu ti tau ngenyai.
Iya mega ngansak semua kaban parti ngemerat ke pengawa parti ngelui ari penguntung diri empu dikena nentuka PRS enggau GPS meruan tegap napi PRN ti deka datai.
“Enti bisi bida penemu, kitai berandau. Enti bisi penanggul, kitai mutar.
“Tang anang kitai mai penyarut nya ke luar,” ku iya nandu.
Ba pengujung jaku, Gira meri terima kasih ngagai semua tuai PRS enggau GPS, raban Nembiak enggau Gerempung Indu, kaban parti sereta kaban PRS ari selampur Sarawak ti meruan taluk ke parti.
Iya mega ngena awak nya meri Selamat Ngintu Gawai Dayak 2026 nuju semua rayat Sarawak, Gayu Guru, Gerai Nyamai, Lantang Senang Nguan Menua.
Pengerami Mantar Gawai Dayak PRS 2026 nya digulu raban supreme parti, pengari rayat, tuai renggat baruh sereta kaban PRS ari selampur Sarawak diintu enggau chukup rami sereta lanchar serimbai pengerami Gawai Dayak ti deka datai.
