KUCHING: Penemu politik bebida patut diiar ke tisi pulaika pemaik begulai, ku Presiden SDNU Tan Sri William Mawan Ikom ngelalau bala kaban gerempung.
SDNU tu sebengkah gerempung ti mekuhka pengawa pemansang komuniti Dayak lalu ukai sebuah parti politik, ku Mawan.
“Bala kaban SDNU patut ngiarka bida penemu politik laban tuju kitai enggau parti politik enda sebaka.
“Taja pia, pekara nyata kitai nyukung perintah ti megai pengawa diatu,” ku iya.
Iya mansutka jaku nya lebuh pengawa bejadika Aum Besai Tiga Taun Sekali (TGM) enggau Makai Taun Ke-63 SDNU ti dipenyadi Kepala Menteri, Datuk Patinggi Abang Johari Tun Openg ditu, kemari.
Ku Mawan, pangku pengawa SDNU patut ditegap agi ari dalam nyadika pengawa matak penyereta ari raban nembiak.
“Kitai patut chakah gawa matak penyereta rebak biak nengah pengawa ngatur sekeda aktiviti baka bengkel, simposium enggau ke bukai.
“Kebuah pia laban bala kaban kitai empu datai ari bala ketuai ti ngembing pejalai nentuka SDNU meruan diterima,” ku iya nerang.
Mawan mega dekaka SDNU ulih gawa ngatika diri ari sukut ngenegapka belanja.
“Aku nemu Kepala Menteri siku orang ti mentas maya ngagihka belanja tang berapa lama kitai deka ngandalka iya.
“Enda patut kitai deka nyalak belama,” ku iya seraya ngarapka SDNU ulih bediri ngatika diri udah tu.
