Bida servis bas suba enggau diatu

Mayuh endar bida ti diasaika aku lebuh niki bas lumur 8G menya maya agi sekula 10 taun ke udah, enti dibanding enggau servis bas elektrik pechuma di mengeri Kuching, ku Pemberita Suara Sarawak Fenny Silong lebuh nusui peneleba diri pengudah nepan servis bas elektrik kemari.

Aku enggau anak ke beumur lima taun nguji raun nguna servis bas elektrik pechuma berengkag ari 103 Rumah Ngibun Lions di Jalai Stutong ngagai Palan Nyaga Jelu Siga Semenggoh.

Kitai ulih nemu dini pejalai bas elektrik nya nengah aplikasyen Kuching Metro lalu enda ibuh nganti lama baka 10 taun ke udah.

Aku kala nganti bas nyentukka dua jam enggau enda nemu dini alai tauka pejalai bas nya.

Seriris enggau teknologi moden, bas elektrik nya disikap enggau perengkaguna wifi ungkup guna bala penumpang.

RAUN…Anak Fenny, Emmanuel Ramba enggau akak iya Carollina benung ngasaika penyamai servis bas elektrik pechuma kemari.

Sunyi enggau nyamai nya runding aku keterubah lebuh tama dalam bas elektrik ti keterubah ba Malaysia tu.

Anak aku majak nyebut diri ‘rindu’ ulih bejalai ngena bas ti moden tu. Ya…endang amat iya endang patut ngasaika servis bas baru nya.

Pejalai bas mansa jalai Kuching Sentral enggau Padang Bilun Entarabansa Kuching (LTAK) ti deka ngemuntangka raban temuai nyema sektor dagang temuai dibuka ila.

Jaku gerah automatik sebedau ngetu ba palan ngetu bas bukai ulih ngasuh bala penumpang nyikap diri laban sistem nya sebaka enggau LRT.

Aku mega sempat ngerandau deriba bas kuasa karan nya Ranseng Madang, 58 ti madahka mayuh peranak mengeri Kuching nguji raun ngasaika penyamai ngena bas elektrik nya.

“Pejalai bas ari Dun ke Semenggoh mayuh agi orang enti dibanding ari Semenggoh nuju Dun.

“Aku meda makin mayuh peranak di Kuching sedarka pemisi servis bas tu,” ku iya.

Rohana Razali, 31 taun mega madahka iya baka aku empu bisi mai anak raun ngena servis bas kuasa karan pechuma.

“Jauh nyamai mai anak-anak raun ngena bas tu kelimpah bisi takah ari pangan diri.

“Nangkan nya, chara tama ngagai bas tu endang nitihka SOP lebuh penumpang ngena aplikasyen MySejahtera enggau diperesa pengangat isi,” ku iya.

Amai, aku pan ngasaika penyamai sereta selamat mai anak laban bisi CCTV.

Kelimpah ba dalam bas, penumpang semina ulih tama ari pintu mua lalu pansut ari pintu belakang.

Aku deka mai anak aku numpang sereta nguna servis bas tu baru udah tu ila.

Fenny (kiba) begambar kenang begulai enggau anak iya dalam bas elektrik.

 

Sekeda penumpang ti sama deka ngasaika penyamai raun meda rampa menua ngena servis bas eletrik pechuma di Kuching.

Suara Sarawak