BINTULU: Bintulu sekali agi nurai penyulut besai pengudah diaku nyadi siti ari 20 Mengeri Pemadu Lantang di Malaysia 2025 ba baruh Indeks Pengelantang Malaysia ungkup kategori Kaunsil Mengeri.
Kaunsil Pemansang Bintulu (BDA) nerima setipikit ngaku nya berebak ari penyulut mengeri nya ba pengerami Hari Pengelantang Antarabansa Renggat Nasional ti diatur Opis Menteri Pengawa Berumah enggau Perintah Lokal di Putrajaya empai lama.
Kelimpah ari Bintulu, bisi 11 mengeri bukai bela dipasuk ba rintai nya nyengkaum Temerloh (Pahang), Bandaraya Diraja Klang (Selangor), Port Dickson (Nengeri Sembilan), Jasin (Melaka), Pontian (Johor), Ampang Jaya (Selangor), Batu Pahat (Johor), Mengeri Besejarah Melaka (Melaka), Petaling Jaya (Selangor) Johor Bahru (Johor) enggau Putrajaya (Wilayah Persekutuan Putrajaya).
Nambah ke nya, ungkup kategori Kaunsil Pelilih, bisi lapan mengeri diaku nyadi Mengeri Pemadu Lantang iya nya Lipis (Pahang), Cameron Highlands (Pahang), Kuala Krai (Kelantan), Bandar Baharu (Kedah), Kuala Pilah (Nengeri Sembilan), Jerantut (Pahang), Jelebu (Nengeri Sembilan) enggau Telupid (Sabah).
Pengawa ngaku nya mungkur bemacham sukut pengelantang nyengkaum kualiti idup, pengelantang genturung enggau sosial komuniti.
Penyulut Bintulu nya mandangka komitmen betampung ba pengawa nempa gaya idup ti positif enggau kondusif ungkup pengelantang komuniti lokal.
