KUCHING: Sarawak keran seruran ba luan bekaul sains bioperubat dunya, ku Premier Sarawak, Datuk Patinggi Tan Sri Abang Johari Tun Openg.

Iya madah, Sarawak bisi penegap ba biodiversiti ti dikeandal bisi pengulih besai ba pengawa nya.

“Sarawak keran deka bejalai seraris enggau dunya kelebih agi ba pengawa sains bioperubat lalu aku andal ditu meh pengering kitai, enggau beratika pengulih besai biodiversiti ti bisi ba nengeri tu,” ku iya.

Abang Johari nyebut pekara nya dalam teks jaku ti dibacha Sapit Premier Sarawak, Datuk Seri Dr Sim Kui Hian ba Pengerami Makai Malam Gala nyerumba Aum Besai Saintifik Antarabansa enggau Eksibisyen Dagang Gerempung Ortodontik Malaysia (MAO) Ke-29 ditu, malam tadi.

Berindik ari nya, Abang Johari muji pemansang pemadu baru ba industri bioperubat Sarawak kelebih agi Palan Penyakit Berampit Sarawak (SIDC).