KOTA SAMARAHAN: Bisi 126 agih belanja udah disua ngagai penerima serimbai Program Siruka Rayat Renggat 2 2023 kemari.
Sapit Menteri Pemansang Menua Pesisir enggau Wilayah, Datuk Rubiah Wang madah, entara penerima nya baka Komiti Pemansang enggau Pengelikun Genturung Pendiau (JKKK), Gerempung Apai Indai enggau Pengajar (PIBG), Kaunsil Pengatur Sekula, kelab enggau gerempung.
“Agih belanja nya dikena meri pemaik ngagai raban bekaul nambah aktiviti sosial sida empu,” ku iya.
Rubiah mansutka jaku nya ba sebengkah penerang Facebook iya serimbai Program Siruka Rayat Renggat 2 2023 ba Balai Dato’ Wan Ahmad Shabri Zainuddin, RISDA Nengeri Sarawak ditu.
Iya madah, program nya diatur dikena ngaul rayat ngelingi sitak Kota Samarahan.
Nangkan nya, iya ngelalau mensia mayuh meransang anak sida milih Pelajar sereta Latih Teknikal enggau Vokasional (TVET) lebuh nampung pelajar.
“Insya-Allah, bala anak kitai deka disikap ngena bemacham latih pengelandik ti menyana ngambi ulih besemekih dalam industri dipasuk sida jemah,” ku iya.
