Bitanding Dayung Gawea Tematu 2020 dikinsil

KUCHING: Pengerami Gawai Tematu enggau Bitanding Dayung Gawea Tematu 2020 dikinsil ketegal pengerekai igi penyakit Covid-19 ke nyadi jam diatu.

Chairman Kelab Rekreasyen Penguna enggau Pengatur Pengawa Balai Mayuh Guna Kampung Tematu, John Pata James Jumin madahka pengerami edisyen ketujuh nya dikinsil laban kaban kelab nya beratka pengerai mensia mayuh.

“Nya kebuah, kami deka madahka Pengerami Gawai Tematu enggau Bitanding Dayung Gawae Tematu 2020 dikinsil ngambi meri awak mutuska rantai pengerekai penyakit Covid-19.

“Pengawa ke deka diatur kena 19 enggau 20 June ba Balai Mayuh Guna Kampung Tematu enda ulih diatur laban kaban kelab tu ngemeratka pengerai mensia mayuh,” ku iya meri penerang, ditu kemari.

Terang John, sida ngarapka pengerami baka tu ulih diatur taun dudi.

“Kami minta ampun ngagai semua piak ti udah besedia deka nyeret pengerami nya ketegal penusah ke enda ulih diseliah diatu,” terang iya.

Pengerami Gawai Tematu enggau Bitanding Dayung Gawae Tematu nya aktiviti ninting taun diatur peranak bansa Bidayuh ba Kampung Tematu maya Pengerami Gawai Dayak.

Taun nyin kemari, Eve Isabelle dipadu nyadi champion Dayung Gawea Tematu 2019 seraya lumur dua diempu Agnes Anadtasha Amat enggau lumur tiga dipenggi Iirne Yap Hui Xin.

Bala pemenang udah mai pulai mata duit, jumpang, trofi, sash enggau segupung bungai.

Pengerami nya diatur kaban kelab nyadi sebagi ari pengawa belepa enggau kaban belayan kelimpah ngempit kaul entara peranak ba genturung pendiau nya.

John Pata James Jumin