SPAOH: Pengawa ngabang serimbai pengerami besai pupu bansa nya tradisyen ninting taun ti nyadi pugu pengelantang komuniti Sarawak.
Sapit Premier Sarawak, Datuk Amar Douglas Uggah Embas madah, pengerami ukai semina dirami sesebengkah raban bansa tang dirami begulai semua rayat Sarawak lalu pelasar beguna narak semangat bebaik.
“Lebuh bisi pengerami sekali ke Taun Baru China, Gawai Dayak tauka Hari Raya, kitai deka ngabang enggau pangan diri nyadi chara negap kerejasama, bebaik enggau kaul ti rapat.
“Kitai mega ngulihka timbal bekaul pekara ti nyadi sereta mereti ke utai ti diguna ba endur nya,” ku iya lebuh dirandau pemberita lebuh ngabang Taun Baru China ngagai sekeda rumah Tuai Raban Bansa enggau Tuai Komuniti China ngelingi Pasar Spaoh, Hari Tiga tu tadi.
Pengawa ngabang nya, ku iya, mandangka semangat beserakup enggau ngayanka pengelantang pupu bansa ba Spaoh nipak juluk perintah nengeri ngambi terus negap pengelantang sosial enggau pemansang inklusif ba Sarawak.
Iya mega meri Gong Xi Fa Cai enggau Xin Nian Kuai Le ngagai komuniti China ti ngintu pengerami besai nya enggau pengadang taun baru mai mayuh agi pemansang, pengelantang enggau pengaga.
Pejalai ngabang diatur Palan Servis Kunsil Nengeri (DUN) Bukit Saban nya diatur ari pukul 11.30 pagi nyentuk 3.30 lemai lalu ngabang ngagai enam rumah nyengkaum rumah Pemancha Goh Leng Thong, Kaunselor Lai Ngit Shin enggau Kapitan Jong Koi Chian.
Uggah ti mega Menteri Infrastruktur enggau Pemansang Penyangkai Kapal Sarawak ti nyadi Kaban Kunsil Nengeri (ADUN) Bukit Saban datai begulai enggau bini, Datin Amar Datuk Doreen Mayang.
Bela nyempulang, Kaban Parlimen Betong, Datuk Dr. Richard Rapu sereta tuai enggau pegawai bukai.
– EDISI UKAS
