BA pelilih Bau ti dikelingi rampa menua gadung enggau mayuh bukit, Bung Bratak ukai semina siti palan penyangkai aja tang mega siti arkib ti idup.

Ukai didiri ba atas batu tang didiri ba tanah bebukit ti ngelai pengingat enggau semangat etnik Bidayuh ti enda nemu surut.

Udah dua kali aku nemuai kitu lalu aku ngasai ke pengawa niki tuchung Bung Bratak nya baka siti pengawa ngemantup ati.

RAMPA MENUA MERUAN

Ba sepanjai jalai niki bukit nya, kitai deka dinah enggau rampa menua gadung, bunyi burung ti richah belagu sereta

urat kayu engkilung baka urat darah ditujah kaki.

Tetiap singkang niki bukit nya asai ke niti bekau kaki bala aki ini kitai suba, nya siti pejalai lubah nuju sejarah.

Ba sekeda orang, engka tu siti pejalai niki bukit ti nguji pengering tubuh enggau runding sereta meri pengelantang ngagai ati.

Tang ba orang bukai, pejalai tu bepun ari jalai alun ti mayuh simpang seraya nimbai pemanah rampa menua gadung enggau genturung pendiau Bidayuh ba menua pesisir.

Dikena ngenatai diri ba Palan Pesaka Bung Bratak (BBHC) ti bepalan ba tuchung bukit nya, kitai ulih tama nengah balai ngambat penatai temuai lalu entukar diengkah ba entepan ti disedia.

Tu siti inisiatif nentuka Bung Bratak ulih ditiki mensia mayuh taja rampa asal palan nya mengkang dijaga meruan.

Ba tuchung bukit nya, dunya asai ti sedandang laban ari atas tuchung nya, mensia mayuh ulih nimpai pemanah enggau penyelai rampa Bau.

Ari tuchung nya mega, garis langit baka ti benung ngerembai, tuchung bukit dibungkur kampung gadung, sungai nyau perenching dipanchar mata panas dipeda ari jauh lalu rumah peranak nyau beranchau manah ba baruh kaki bukit.

Angin ba tuchung bukit ditu chelap lalu kesuh ribut ti bepuput ayun lundai meri pengelantang.

GENTURUNG PENDIAU ASAL

Siku Penyanding Penemu Gerempung Pesaka Bung Bratak (BBHA), Datuk Peter Minos madah, Bung Bratak suba siti genturung pendiau etnik Bidayuh ari etnik mit Jagoi-Bratak ti bepalan ba tuchung bukit nya.

Ninting hari diau ditu, sida bumai padi ba kaki bukit Bung Bratak, ngasu ba kampung sereta ngulihka asil ikan ba sungai enggau paya.

Pengidup sida ukai semina beretan lama tang chukup mujur. “Rikod ari orang Eropah ba jeman ke-19 bisi nerang pasal pengaya Bung Bratak.

“Komuniti dia bagas gawa, mayuh tibang padi, ikan masin enggau dagin ti chukup mayuh.

“Sida mega kaya enggau budaya, sida bisi kereban tabuh dikena ngintu pengerami ti nyadi simbol adat enggau pengidup komuniti.

“Lebuh agi diuan komuniti Bidayuh suba, bukit tu bisi dipadah diuan urung 1,000 peranak Bidayuh,” ku Minos.

SEJARAH PAIT

Ba bulan Mei 1838, ba baruh pengangat mata panas tengah hari, penusah nuntung ngenyit.

Seraban pengayau ari Skrang nurun nyerang komuniti Bidayuh ba Bung Bratak.

Serang nya chukup jampat sereta ngenyai semua utai nyengkaum peranak lelaki, indu enggau nembiak bela dibunuh.

Rumah sida dilamun, barang berega dirampas lalu urung 300 nembiak mit ditaban lari.

Penusah nya mih ti ngujungka bukit nya nyau sengian nadai orang nguan.

Sida ti mujur ngidupka diri ari penusah nya pulai baru ngagai genturung pendiau sida ti udah anchur nyadi debu.

Nengah iring Panglima Kulow, sida ngepun pengawa ti berat nampung baru pengidup ti udah anchur.

Ba taun nya mega, Panglima Kulow ngulu ke raban sida betemu enggau Rajah James Brooke ti megai kuasa British ba Sarawak maya nya.

Peminta sida chukup mudah tang besai bendar reti; sida minta bala sida ti udah ditaban ke munsuh dibai pulai baru.

Brooke setuju enggau peminta sida.

Nya alai, nengah sukung senyata, iya ngulu ke bala soldadu iya nyerang Iban Skrang sereta mujur ngulihka baru 300 nembiak mit ti udah ditaban lari nya pulai baru ngagai Bung Bratak.

Pengawa betemu baru nya, ku Minos, penuh enggau pengaga sereta terima kasih.

Iya madah, nya mih seling penampak ti negapka baru pengadang sida pengudah napi sejarah pait nya.

PENGIDUP BARU

Ari taun 1839 enggau pengudah nya, Bung Bratak baka ti angkat baru.

Ba baruh pegai British, jeman bekayau mujur diketu sereta mulaika baru pengelantang menua.

Baka mayuh endur bukai di Sarawak, Bung Bratak majak ngerembai sereta tegap.

Rayat dia ukai semina berengkah ngentak rumah baru tang nungkat baru semengat komuniti ti sempat padam sebedau nya.

Taja pia, berindik ari ubah jeman, ba taun 1960-an, mayuh peranak ti berumah ba tuchung Bung Bratak mupuk pindah ke kaki bukit nya.

Sida ngiga peluang baru dikena nampung pejalai pengidup ti muntang agi.

MAJAK NGEREKAI

Beratus taun udah nya, peturun Bung Bratak nyau berengkah ngerekai ngagai selampur pelilih Bau enggau Lundu.

Ba taun 2000, bisi 35 genturung pendiau Bidayuh ba kededua pelilih nya dirikod datai ari genturung pendiau keterubah ba bukit tu.

Diatu, pesaka Bung Bratak terus idup nengah komuniti ti manggai urung 40,000 iku sereta nengah pengawa numbuh BBHC ti nyadi kunchi ngagai identiti sida.

Ba tuchung bukit nya bediri reregah BBHC, kelai pengawa. nyaga pesaka enggau ngerami pengaga ati.

DIGAZET

BBHC ditumbuh entara taun 2015 nyentuk pun 2018 lalu digazet nyadi palan sejarah enggau pesaka asal ba bulan September 2022.

Diseruri enggau dikemansang sekumbang dipegai Minos ti nyadi Chairman BBHA kenyau ari taun 1988 nyentuk 2025.

Palan besejarah nya disikap ngena rumah ti mandang struktur asal Bidayuh nyengkaum dua rumah panjai enggau siti baruk.

Baruk nya siti rumah segala ikonik ti nyadi palan begempuru enggau bejalaika pengawa adat asal.

Pia mega, palan nya bela disikap ngena balai ngambat penatai temuai, balai makai enggau bilik aum.

Bejalai ba palan pesaka tu, bala temuai deka nemu sereta ngelala silik agi pasal gaya nyelai begunan Bidayuh.

Langkar kayu, balai sedandang sereta dikelingi kampung, semua nya nyimpan cherita ti meruan ditampung ari aki ini sida dulu suba.

PENGERAMI BUNG BRATAK

Berengkah ari taun 1988, pengerami Hari Bung Bratak diintu ninting taun kena 1 Mei.

Nya siti chara komuniti Bidayuh ngenang sejarah sida ba Bung Bratak kelimpah dikena ngangkat baru palan nya nyadi palan ti idup.

Minos madah ke nya hari ti penuh pengaga, pengingat enggau sejarah ti mai komuniti Bidayuh dia enggau bala pengabang begempuru bebasa ke pesaka ti dikunsi.

Ba hari nya, tanda asal, bansal makai asal komuniti, sesyen becherita enggau main asal ngubah bukit nya nyadi palan berami.

Siti pesan ti madah ke sejarah taja pen pedis, ulih nyadi pun penyerakup enggau pengaga ati.

Ba Minos, Bung Bratak besai bendar reti ba diri iya.

“Apai indai aku endang bisi data ari dia,” ku iya nusi.

“Kenyau ari aku agi mit ba pun taun 1960-an, aku udah nemu pasal Bung Bratak enggau sejarah palan tu,” ku iya.

Pengawa iya bepuluh taun ngemansang palan pesaka nya ukai semina kelai pemintar megai tang kelai pengerindu iya ti besai ngagai palan nya.

Taja iya ngetu ketegal udah chukup umur enggau penanggul pengerai, iya ngarap palan majak dikemansang dudi hari.

“Aku ngarap komuniti Bidayuh dudi hari kelebih agi komuniti Jagoi-Bratak deka seruran bebasa ke Bung Bratak.

“Kitai patut seruran ingat ke pun penatai kitai. Tu mih utai ti suah ditusi aku ngagai bala anak aku,” ku iya.

Bung Bratak ukai semina palan arkeologi tauka sejarah aja laban palan tu nyadi identiti komuniti Bidayuh Jagoi-Bratak.

Palan tu enda tau punas laban tu siti palan ti nusui cherita besai pasal etnik Bidayuh ti nyadi siti ari peranak asal Sarawak enggau Borneo.

Tu nyadi bukti penegap ati: siti komuniti ti napi pemunas tang milih angkat baru; siti budaya ti dipindah tang terus ngerembai.

Kesuh ribut ti bepuput ayun lundai ba sengian kampung baka ti bebasa ke pengidup ti kala bisi dia sereta pesaka ti agi tinggal dia.

Temuai ti turun ari bukit nya tebal agi mai ngelui ari gambar tang sida mai pengingat ti besai.

Bung Bratak enda minta diperati tang belubah-lubah ngulihka perati nya nengah cherita enggau sejarah ti disimpan teguh dia. – RINTOS MAIL