• TUSUN DUA

PENELEBA Bungan Creative ngatur woksyop pemun engkau Ekspo Kereban Muzik Lutong 2026 mandangka baka ni inisiatif komuniti lebuh disukung institusyen seni sereta bakih kerejasama ulih meri peluang belajar besai agi.

Bejaku ba pengawa nutup ekspo, Elizabeth Bungan Peter ngenang baru siti pemar ti ditapi lebuh woksyop pemun Lutong ba taun 2025 ke alai penyampau kereban muzik ti disedia enda chukup ungkup bala penyerta.

Peneleba nya uka semina penanggul teknikal, tang mandangka takah entara juluk nyagu pesaka asal engkau peminta praktikal nentuka mensia mayuh belajar terus.

“Mulaika kena lebuh ngatur Woksyop Pemun Lutong ba taun 2025, pemar kitai lebuh nya enda chukup Lutong laban semina bisi siti aja ungkup 30 nembiak ti datai belajar.

“Chukup siku meda sida bekunsika siti Lutong dikena belajar ngujungka timpuh woksyop nyau lama agi nentuka tetiap nembiak ti datai belajar bela amit rebah Lutong” ku iya ngepun randau.

Nya kebuah, Elizabeth madahka siti kereban muzik asal engka chukup ungkup dipandang bala pengajar aja tang peluang bala penyerta belaitih begintir nyau ngangul laban penyampau tubuh sida ti deka belajar nya mayuh.

Berindik ari nya, iya nerangka Kaunsil Seni Sarawak (MSS) nyau ngkebang mayuh agi Lutong dikena nyukung aktiviti nya.

Bantu ari MSS, ku iya, nyadi chunto baka ni sukung institusyen ulih mutar peminta khas bala pemekuh seni.

“MSS mih ti mayuh napuk kami nengkebang baru Lutong bemalinka tukuh asal Lutong dipenggi Pang Selong lalu sida mujur nengkebang 20 iti Lutong.

“Chukup rindu meda pemanah 20 iti Lutong ti mujur nengkebang berekat sukung engkau saup ari MSS.

“Kebuah pia laban udah tu, bala nembiak ti datai belajar nadai suntuk kereban agi lalu lanchar agi belatih.

“Tu mega sebagi ari chara ti nemban dikena merit pangengkun nembiak belajar nebah kereban muzik asal Orang Ulu.

“Berekat pengangkun Pang Selong ti sanggup begulai ngidupka baru pengudah dimubuk aku, ditambah sukung raban MSS nyedia mayuh agi Lutong sereta pengangkun nembiak belajar ngujungka juluk ati aku udah nyadi nyata.

“Enda ulih ditu ngema leka jaku lebuh pengawa ti didekeda ati aku ngelama tu udah nyadi nyata.

“Kebuah pia laban aku chukup pechaya, Lutong ngembuan pengelain diidupka baru ngambi sema tebilang baka bintang ti bekelabik di langit mingkai engkau Sape ti udah gah ba mata dunya” terang iya.

MESETI BERANI

Pangku pengawa MSS ba pengawa nya mega diaku Faizal Othman ti bejaku bejadika pengawa nya ngari ke Tuai Pegawai Eksekutif MSS.

Iya nyemetak madahka institusyen seni ngenang pengawa dipun pemekuh seni engkau komuniti kelebih agi lebuh sida berani nyagu pesaka engkau kereban asal ti apin dikelola mensia mayuh.

“Nyadi MSS, kami chukup ngenang inisiatif baka tu. Pengawa baka dikereja Elizabeth endang patut dipuji laban angkun sereta keran ngidupka baru Lutong tu ngambi dikelola rebak biak.

“Enti enda ari pengeran Elizabeth engkau Pang Selong, pelaba aku rebak biak engka enda ngelala kereban muzik asal Orang Ulu ti disebit Lutong tu.

“Pengawa baka tu patut ditunda entika bukai nentuka adat, main asal engkau kereban muzik asal ti jarang didinga tauka dipeda ulih diidupka baru ngambi ditemu rebak biak.

“Ba jeman digital, penemu sereta pengawa baka tu beguna amat nentuka rebak biak ngelala pesaka asal kitai taja pen udah ngasai biuh pemansang moden,” terang iya.

Pia mega, Elizabeth madahka MSS terus nyuap pengawa nya ba taun 2026 lalu ukai semina nyedia palan pemandang, tang mega mai Lutong majak dikelola sereta ditebah begulai engkau kereban muzik bukai.

“Sekali tu ba taun 2026, MSS sekali da nyuap ba Evolusyen Lutong; iya nya mai Lutong nyadi praktikal agi ba atas pangau begulai engkau kereban muzik asal bukai.

“Pengawa nebah Lutong ba atas pangau ulih meri peluang ngagai penebah kereban muzik asal nambah pengandal lalu mensia mayuh ulih ninga tiun engkau penyelai Lutong,” ku iya bekunsi tangkai penemu diri.

Iya nerangka pengawa mai Lutong ngagai ruang belajar engkau pemerindang dikena nentuka kereban muzik asal nya terus dikena engkau ditebah lalu ukai semina dikingat nyadi kereban muzik lama.

Kebuah pia laban, ku iya, ubah gaya idup ngujungka Lutong jarang ditelah taja pen kereban muzik asal nya kala ditebah ba pengerami besai engkau ulih nyadi pengiring tebah Sape.

MUPUK BEGADAI

“Tang, ubah gaya idup ngujungka ruang Lutong ditebah majak kurang, enda baka Sape ti tebilang diatu.

“Nya kebuah, ari woksyop ti diatur kenyau ari taun 2025 lalu ditampung tu nudi nyadi sebagi ari chara nyagu Lutong sebaka enggau Sape,” ku iya.

Ba pekara nya, peneleba nebah Lutong begun endar lalu Elizabeth nerang, ekspo ngempung pengawa belajar, mandangka chara nebah, woksyop, pemerindang sereta berandau terus nentuka rebak biak rindu agi belajar nebah Lutong.

Chara tu, ku iya, ulih nyaup ngubah kereban muzik asal nya nyadi kereban ti ulih diuji engkau dipelajar.

“Rebak biak meseti diberi peluang ngasai kediri nebah Lutong lalu ukai semina meda aja.

“Ari pengingin ati nguji nebah Lutong tu tau ngasuh sida labuh pengerindu lalu belubah pengerindu sereta pengangkun nya nyumbuk ba lubuk ati sida.

“Nya entara tuju ngatur woksyop engkau ekspo ba palan besai bebeli ke barang laban ari nya, bala nembiak ti datai meda penyelai kereban muzik asal Orang Ulu tu lalu bisi pengingin nguji nebah.

“Betul tauka salah nya sigi udah adat kitai baru belajar. Sigi mayuh mih pengilap.

“Tang kami deka ngajar sida endgau chukup puh sereta belubah.

“Pemadu beguna, sida bisi pengerindu belajar. Laban ari pengerindu, sida tentu keran deka nemu nebah lalu ngujungka sida landik agi ga,” ku iya baru.

PUH BELAJAR

Elizabeth nerangka woksyop pemun mai bala penyerta nemu struktur engkau begian Lutong kelimpah belajar chara megai engkau nebah.

Pekara pemun tu beguna amat, ku iya laban pengawa nguasa kereban muzik asal begun ari mereti ke chara ngena sebedau sida belajar rurun pengawa ti mar agi.

“Kami dekaka bala penyerta pulai ukai semina bulih pengelandik pemun, tang mega dekaka sida bisi pengingin terus belajar.

Tambah mega, Faizal bisi nyebut bekaul pemesai guna meri peluang ngagai rebak biak ngelala pesaka asal nya.

Ku iya baru, sida ukai semina meda engkau megai kereban muzik asal nya, tang meseti belajar sereta nydi rurun cherita.

“Rebak biak meseti diberi peluang meda, megai, belajar nebah engkau mereti ke cherita bekaul penatai asal kereban muzik asal nya,” ku iya nyemetak.

Kebuah pia laban, ku iya, ari penyelai cherita nya sida tentu bisi pengerindu majak belajar nentuka kereban muzik asal nya terus idup ba jeman moden diatu.

Ukai naka nya aja, rebak biak ba jeman digital diatu mega ulih nyagu kereban muzik asal nya nengah chara digital engkau bemacham pelasar media rama.

Elizabeth mega ngembuan juluk nampung dokumentasyen bekaul Lutong nyengkaum ngagang bup nentuka penemu ke bisi diatu enda naka nya aja tang majak ngerembai.

KEREJASAMA SEMUA

Ku iya, dokumentasyen tu ulih nyaup ngumpul penerang bekaul kereban muzik asal, peneleba engkau chara belajar nyadi malin rebak dudi.

Ngenang jaku ditibar Faizal, iya nyemetak madahka seni engkau budaya enda ulih semina berpanggai ba institusyen.

Berindik ari nya, ku iya, komuniti, pemekuh seni, pemuzik engkau organisasyen baka Bungan Creative ngesan pangku pengawa besai nentuka pesaka asal tu terus idup.

“Kami pechaya, seni engkau budaya ukai semina berpanggai ba institusyen tang komuniti, pemekuh seni, pemuzik engkau organisasyen baka Bungan Creative mega ngembuan tanggungpengawa ti chukup besai,” ku iya nyemetak.

Elizabeth madahka ekspo nya nerima sukung ari Sarawak Culture & Heritage ari sukut atur engkau makit, PUSAK nengah peneleba sereta rentayan ngap muzik asal lalu The Spring Shopping Mall ti melania ruang ekspo.

Kerejasama tu nentuka Lutong dikelola bala pengusung ari mayuh tirai juru nyengkaum sida ti engka enda kala merambu ngu lu program main asal.

“Ba aku, mai pesaka ngagai bala komuniti nya sebagi ari chara nyagu seni asal.

“Aku ngarap udah tu mayuh agi orang ngelala Lutong, belajar sereta deka nebah kereban muzik asal Orang Ulu ti diidupka baru tu.

“Enti kitai dekaka pesaka asal tu terus idup, kitai begunaka orang ti deka belajar,” ku iya.