KUCHING: Agih belanja RM30 juta ungkup sekula mission Sarawak taun tu ukai semina ngaduka infrastruktur aja, tang RM10 juta ari agih nya dikena ngangkatka penyulut akademik nembiak.
Sapit Premier, Datuk Amar Douglas Uggah Embas madah, agih belanja dikemendarka Premier Sarawak, Datuk Patinggi Tan Sri Abang Johari Tun Openg nya renggat keterubah ari semua agih belanja RM30 juta taun tu.
Ku iya, agih belanja nya nambah enti dibanding RM20 juta ti disedia ninting taun kenyau ari lima taun ke udah.
“Teda RM10 juta da deka dikena ngatur program ngangkatka penyulut akademik nembiak ba sekula mission,” ku iya.
Uggah nyebut pekara nya ngagai pemberita pengudah pengawa nyuaka chek ba Kunsil Nengeri (DUN) Sarawak ditu, ensanus.
Iya madah, pengawa ngangkatka penyulut akademik beguna endar ngambi bala nembiak ulih ngena manah Skim Pelajar Tinggi Penchuma (FTES) ti dipejalaika Perintah Sarawak.
“Program tu deka mungkur bidang sains, teknologi, injiniring engkau matematik (STEM), kelimpah landik ba jaku English, Matematik sereta pengelandik macha engkau nulis.
“Enti nembiak enda nemu macha tauka nulis, penanggul pemun tu apin teputar,” ku iya nyemetak.
Uggah madah baru, teda RM10 juta nya deka diberi ila nengah komiti ti ditumbuhka sekula mission nentuka pengawa magi agih belanja nitih denominasyen sida empu.
Bisi enam raban pengatur sekula mission nerima chek nya ngambi diberi ngagai sekula dipegai sida.
“The Anglican Diocese of Kuching nerima RM7,751,900 nengah 50 chek, dientudi Roman Catholic Archdiocese of Kuching sepenyampau RM4,961,216 (32 chek) engkau The Roman Catholic Diocese of Sibu sepenyampau RM3,565,874 (23 chek).
“The Roman Catholic Diocese of Miri nerima RM1,085,266 (tujuh chek), The Methodist Sarawak Iban Annual Conference nerima RM1,240,402 (lapan chek) engkau The Methodist Sarawak Chinese Annual Conference ampit RM1,395,342 (semilan chek),” terang iya.
Uggah ti mega Menteri Ngempu Tanggungpengawa Unit Pekara Jalai Pengarap Bukai (UNIFOR) madah, chek disua ngagai pengari gerija nya sebagi ari pengawa negapka pangku pengawa raban pengatur pengarap.
Iya madah, sepenyampau RM90 juta diagihka taun tu ungkup rumah sembiang, ke alai RM34 juta ari nya udah diberi.
Iya madahka bantu nya siti ubah besai ngagai sekula mission, gerija engkau rumah sembiang bukai di Sarawak.
