Chairman MPS asa sereta irau ati meda ulah mensia enda nitih PKP

SIBU: Ulah sekeda peranak Sibu agi ngelanggar atur enggau enda bekerejasama mutuska rantai Covid-19 baka dipadahka perintah sebedau tu ngasuh mayuh piak irau.

Ulah mensia mayuh berintai panjai ba semua bank di Sibu kemari baka ngumbai Atur Tagang Pejalai (PKP) tu udah abis dipejalai ba menua tu.

Ulah tu ngasaka ati Chairman Kaunsil Kandang Menua Sibu (MPS) Clarence Ting Ing Horh yang sempat memuatkan kenyataannya di laman sosial berkenaan dengan situasi tersebut.

“Kemari, bank ba Sibu nyau dedat endur mensia mayuh ngambi duit, nyau baka udah abis PKP.

“Palan paking entukar mega penuh kelebih agi ba mua bank baka ari Jalai Kampung Datu ngagai Jalai Tunku Osman

“Kaki lima mega mayuh orang, bisi 50 iku lalu sida tu enda nitihka atur nyaga takah enggau pangan diri,” ku iya nyemetak madah.

Ku Ting, igi penyakit Covid-19 tu deka nambah berapa minggu ke deka datai enti sema komuniti ba Sibu agi ngereja ulah baka tu.

“Peranak Sibu ditemu mayuh positif Covid-19 tang agi pansut ari rumah enggau mimit aja sida ti beperesa enggau dipatau.

“Pengawa dikereja sida tu ulih ngeruga pengerai enggau pengelikun sida empu kelebih agi ba bank nya,” ku iya nerang.

Ting tepedaka utai ke nyadi ba bank nya enda ulih ditagang agi lebuh mensia mayuh dedat ngagai bank.

“Aku meda, Bank RHB enggau Public Bank agi mayuh orang urung pukul 1 lemai,” ku iya ngelansa.

Ting mega madah, iya udah nganjung pesan ngagai tiap bank ditu ngambi ulih matau pemayuh orang ti tama kia.

Lebuh pemberita matau kia, semua bank ba Sibu dedat laban mensia mayuh ke deka diadu ba kaunter bank.

Nitihka penerang ari sebuah bank ditu, sida udah minta bantu Rela matau mensia mayuh kelebih agi sida ti bebaris panjai ba luar bank nya.

“Kami enda ulih matau sida ti bebaris ba luar bank lalu dalam bank kami ulih ngasuh tujuh ngagai lapan iku tama seraya ke bukai nganti ba luar.

“Udah semua sida tu tembu, baru kami ngasuh sida ke bukai tama,” terang iya.

Suara Sarawak