EMPAI lama, penanyi bajik ti tebilang enggau lagu Bujang Simunjan, Christal Natalie ti rindu agi dikangau Chris mujur ngeluarka lagu pemadu baru iya ti pejuluk Lelaki Kunchi Ati.

Lagu nya dikeluarka nengah pelasar YouTube OCH Sound Production kena 5 November 2024 sereta dipeda ba penyuah lebih 50,000 kali enggau dikerindu ke 607 iku orang.

Nemu kita, lagu Lelaki Kunchi Ati nya besai bendar reti ba pengidup penanyi biak ti udah bisi orang ngempu nya.

Udah tentu mayuh bala bujang ba luar dia lebu laban pintu ati dara manis tu udah tekunchi lalu semina siku ‘bujang betuah’ aja ti bisi megai kunchi ati iya.

Sapa enda bagi ‘bujang betuah’ nya kini? Taja pia, ngarap ke bala peminat Chris bela nyukung sereta besampika pengelantang enggau kisah pengerindu artis ti dikerindu ke kita tu.

Ungkup penerang semua kelebih agi bala peminat iya, kisah dalam lagu tu endang diangkat ari kisah pengerindu Chris empu.

PENGERINDU ENTARA MENUA

Ngenang silik agi, Chris madah, kisah dalam lagu nya ngenang pengerindu dua iku sulu ti jauh ari pangan diri tauka Long Distance Relationship (LDR).

Terang iya, seduai jauh ari pangan diri ketegal dara nya nampung pelajar di menua orang lalu bujang nya gawa di menua.

“Berat amat asai ati dua iku sulu nya deka meleka tauka jauh ari pangan diri laban enti nitihka pengasai ati, seduai sigi deka begulai semak belama.

“Anang ke nyau betaun, seminit aja meleka pen asai ti lama.

“Sehari enda bepeda, ati nyau sesengit ngiga. Enggai jauh! Lelengau belama.

“Tang nama daya, dara nya nampung pelajar di menua orang dikena nyapai juluk iya ti deka nyadi siku pengajar.

“Lalu bujang nya gawa di menua ngiga belanja dikena seduai berami besai melah pinang jadi melaki bini dudi hari,” ku Chris enggau mua sinu ngenang nasip diri.

Seraya narit seput dalam lalu dikesuh belubah, iya nampung baru, seduai bela sayau ke pangan diri sereta besemaya nyaga ati diri empu ngambi enda berubah.

Ku iya, LDR tu ukai semina penguji tang tu ngajar kitai reti penaluk, pengeliat ati sereta nyaga ati diri empu taja jauh ari pangan diri enggau lama enda betemu.

Chris beterima kasih laban pemansang teknologi digital kelebih agi media sosial balat mantu sida ti napi LDR.

“Taja pen jauh diserara tasik besai tang nengah media sosial tu, kitai ulih betelefon, beranjung pesan sereta ngaga kangau video enggau pangan diri.

“Tu ulih ga mantu ngemantupka pengelengau enggau nanya berita pangan diri. Jauh ba mata tang semak ba ati!” ku iya.

KELAI PENGIBUH

Chris nyemetak madah, LDR tu endang mayuh penguji lalu nya kebuah kededua raban patut mandangka effort ngagai pangan diri.

Enti ulih, ku iya, kitai patut suah agi update pangan diri baka madah ke nama pengawa digaga, kini ke pejalai, nanya berita, beranjung gambar tauka video sereta betelefon tauka ngaga kangau video.

“Tu beguna amat ngambi tawing nuan enda irau ati enggau mayuh peragam.

“Enti nuan ngaga baka nya, dia tawing nuan ngasaika diri dikeibuh, dikesayau, diberi perati enggau semampai dikenulu kelimpah ngelai iya lurus ati sayau ke nuan.

“Tang enti nuan jarang update ngagai pangan diri, tentu tawing nuan deka irau ati, mayuh peragam, kusut runding enggau enda ulih ngereja pengawa ketegal irau ke nuan.

“Bisi ga sekeda orang enda mereti ke pekara tu lalu madah ke tawing iya kelalu nagang (control), balat ninding, enda nyamai asai enggau ke bukai lebuh dipinta meri update.

“Nya ngujungka sida jampat leju, berubah ati lalu ngiga orang bukai ketegal ngembuan pemereti ati ti salah ngagai tawing diri,” ku terang Chris enggau panjai.

Tandu iya, tawing ti nemu bebasa enggau beamat-amat sayau ke nuan, iya enda ngaku pengawa meri update nya ngeruga enggau nating iya.

Kelimpah ari nya, ku iya, seduai deka seruran ngiga peluang ungkup betemu dikena ngemantupka pengelengau ngagai pangan diri.

Chris meri terima kasih laban sulu ati iya chukup mereti ke juluk iya enggau enda nagang iya nyapai juluk diri.

Nangkan nya, iya madah, lebuh nyadaka lagu Lelaki Kunchi Ati, iya nyadaka lagu nya ari ati iya pemadu dalam ti ditenun ngena tali pengerindu enggau ubung lelengau.

UDAH SELATAN

Dara penakan China-Bidayuh (sepiak ari apai) enggau Iban (sepiak ari indai) nya rindu ke pengawa belagu kenyau ari mit pengudah suah meda indai iya belagu tauka bekaraoke di rumah.

Berebak enggau nya, ninting hari, pengerindu iya ba pengawa nya majak ngerembai baka bungai pagi hari.

Dikena ngansah pengelandik enggau pengerindu ba pengawa nya, iya suah ngambi bagi ba mayuh pekit belagu ti bisi diatur sereta berani bediri ba atas panggau ba mua bala mayuh.

Enti udah selatan enggau jereki diberi Tuhan sigi nadai kini-kini.

Lebuh umur iya agi biak bendar rambau Pom Dua, Chris udah nyingkangka kaki iya ba dunya pemerindang lokal.

Pengerindu enggau pengelandik Chris ba pengawa belagu sereta pemerani iya bediri ba atas panggau mujur narit ati siku pengajar ti mega Pemungkal OCH Sound Production, Pengajar Oliver Christy Henry.

Hari siti, iya dikangau ke Pengajar Oliver datai ngagai studio ungkup cover siti lagu lalu nya mih singkang keterubah iya ba dunya pemerindang Dayak.

Naka diatu, Chris mujur ngeluarka 11 iti lagu nyengkaum lagu Pait, Litan Dalam Ati, Belama Iya, Seleka Pengerindu, Bujang Melaling Kasau, Nadai Nasip Tua Begulai, Kaul Tua Majak Rat, Nadai Ganti Sulu, Bebali, Bujang Simunjan enggau Lelaki Kunchi Ati.

NYAGA PROFESIONALITI

Tusui anak kedua ari tiga iku diri menyadi nya, lebuh tepejuh ba dunya pemerindang, kitai patut nyikap diri ba mayuh sukut kelebih agi ari sukut fizikal, emosional enggau runding.

Terang iya, lebuh begelar artis enggau dikelala mensia mayuh tentu mayuh orang beratika pengidup kitai lalu nya kebuah kitai patut seruran bejimat kelebih agi ba jeman viral kemaya hari.

Mimit kitai ilap, ku iya, jampat amat orang viral ke kitai lalu nya ulih ngeruga nama manah kitai ke nyadi public figure enggau industri muzik Dayak.

“Enti kitai udah tepejuh ba dunya pemerindang, bula enti nadai orang mejah kitai.

“Dalam mayuh orang ti rindu ke kitai tentu bisi sekeda orang enda rindu meda kitai sereta nguji deka ngelabuhka kitai.

“Nya pekara ti suah nyadi ba dunya pemerindang lalu nya kebuah kitai patut nyikap diri ba semua sukut kelebih agi sukut emosional.

“Aku belagu ketegal aku ngembuan pengerindu enggau pengelandik ba pengawa tu sereta nadai kala masuk kelas vokal.

“Amat pen aku landik belagu tang ukai mai reti aku chukup menyana ba pekara tu laban ti bendar agi mayuh pekara bekaul patut dipelajar ke aku.

“Sekeda orang engka ngengkahka peragam (expectation) ti chukup tinggi ba aku tang lebuh aku enda ulih manggai ba tikas ti dikedeka sida, sida mejah aku.

“Aku minta ampun…aku pen bela anak mensia enda lari ari pengurang enggau penimpang lalu nya kebuah aku belagu nitih ke tikas enggau ungkup diri empu,” ku padah Chris ngemaruhka diri.

Tampung iya, kala mega iya dikumbai orang ‘artis ti enda tebilang’ laban enda kala viral baka sekeda bakih artis ti bukai di sebelah media sosial.

Chris nyemetak madah, iya bisi prinsip ke diri empu lalu enda ngena sebengkah ‘isu’ dikena ngulih populariti enggau nambah view.

Iya meri terima kasih laban ngembuan indai ti semampai bisi ditisi meri sukung enggau peransang lalu lebuh iya labuh, indai mih orang keterubah nyadi tungkat dikena iya angkat baru.

Ku iya ngaku, indai iya ngembuan pengandal ati besai ngagai diri empu sereta berani mantaika diri ba mua mensia mayuh kelimpah nyadi inspirasyen iya ba pengawa merindang.

NYAGU BUDAYA LOKAL

Lebuh dipinta bekunsi pasal juluk iya dudi hari ba pengawa merindang, Chris madah ke iya deka ngangkatka lagu Iban ba tikas ti tinggi agi.

Iya madah, nengah pelasar nya, iya deka ngelakuka lagu Iban sereta muzik enggau pekayan asal Dayak ngambi majak dikelala.

Nangkan nya, artis beumur 20 taun nya ngaku industri muzik Dayak kemaya hari majak mansang ke mua enggau nyapai penyulut besai.

“Udah tentu tu siti pekara ti chukup ngemegah tang sayau kualiti industri muzik kitai majak diseruga sekeda serikat pengeluar lagu ti semina ngemeratka untung aja.

“Enti kitai berati, sekeda serikat tu ngambi penanyi ukai bepelasarka kualiti enggau pengelandik sida belagu tang ketegal sida viral ba media sosial.

“Pekara baka tu patut diketu enggau diputar kitai meruan ngambi enda ngeruga nama manah industri muzik kitai.

“Nya alai, aku ngelalau raban pemekuh industri muzik Dayak semampai ngemeratka kualiti enggau pengelandik penanyi,” ku iya nyemetak seraya mantaika pengelebu diri.

Dikena ngujungka randau iya, Chris meri terima kasih ngagai semua orang ti nyukung pejalai iya ba dunya pemerindang kelebih agi bala peminat, bakih, bakih sama industri, kaban belayan enggau sida sebilik.

“Terima kasih ke sukung semua kita kenyau ari keterubah aku ngaul diri ba pengawa tu nyentuk sehari tu.

“Enti nadai sukung ari kita, sapa mih aku? Aku ulih beretan ba dunya pemerindang tu nyentuk sehari tu ketegal berekat ari sukung enggau sampi kita semua.

“Nya alai, sekali agi aku meri terima kasih ngagai kita lalu teruska sukung kita ngagai aku ngambi aku ransing agi ngeluarka mayuh agi lagu dudi hari enggau terus merindang.

“Chris sayau ke kita semua. Tuhan merekat semua kitai,” ku iya.