KUCHING: Perambu Palan Nembiak Mit Nyelai Pendiau deka digaga taun tu.
Menteri Pengintu Pengelantang Pendiau, Komuniti, Indu, Ruang Bilik enggau Pemansang Anak Mit datuk Fatimah Abdullah madah palan tu deka nyadi siti projek di baruh Tanggungpengawa Rama Korporat (CSR) Petroliam Nasional Berhad (PETRONAS).
“Palan tu nyendiaka servis mulai pemanah ulah nembiak mit nyelai pendiau sereta apai indai ulih nerima perubat ti patut.
“CSR PETRONAS ngagihka RM4 juta ungkup projek tu lalu diatu benung beratika endur ngentak palan tu,” ku iya ba aum pengarang berita pengudah ngetuaika Aum Ninting Taun Kaunsil Pemansang Tumu Nembiak Mit Sarawak (MPAKS) ba Bangunan BaitulMakmur Kuching, kemari.
Ku Fatimah, palan tu ulih nangkup dua peminta raban diselinting iya nya Autism enggau ke bukai agi diperatika.
“Penumbuh palan tu bepanggai ba agih belanja ti diberi raban PETRONAS sereta berundingka bansa peminta khas ba Sarawak.
“Ari penumbuh palan tu dikearap ulih nyadi palan pemulai pemanah ulah ti meruan, khas sereta lantang,” ku iya.
Kelimpah ari palan nya, aum MPAKS mega beratika langgur penemu deka numbuhka sebuah sekula primari ungkup raban tu ba Sarawak.
“Kami diberi timpuh tiga bulan endur kami nyendiaka keretas kereja ngelanggur sekula nya di Sarawak.
“Diatu kami benung beratika bansa latih ti engkeman ba menua luar sereta penyikap perengka guna ti bisi disediaka Opis Menteri Pelajar nengah Opis Pelajar Nengeri Sarawak,” ku Fatimah.
Pengawa ngaga sekula primari tu dulu agi deka dipungkal ba sitak Kuching lalu dikerembai ngagai luar Kuching enti sema nerima timbal ti manah.
