Dagang pemakai Dayak bepengulih besai

SIBU: Pemakai, ai irup enggau lauk asal Dayak bepengulih besai ba dagang ku Sekretari Politik Kepala Menteri Dato Sri Doris Sophia Brodie.

Ku iya, diatu mayuh komuniti Dayak berengkah muka pak makai ti nyual produk pemakai nya.

“Anang enggai nguji bedagang laban kitai bisi macham pemakai enggau ai irup ti tau mansutka asil.

“Kelimpah ari nya, mayuh bansa bukai rinduka pemakai Dayak lalu aku empu beratika pemakai enggau ai irup kitai bansa Dayak bisi pengulih besai ba dagang,” ku iya lebuh bejaku bejadika Panggau Pengerami Main Asal Dayak Borneo (BDCF) 2019 di Dataran Tun Tunku Bujang ditu.

Sama datai Chairman Komiti BDCF 2019 Donna Petrus Ngelai, bala ketuai raban bansa Dayak enggau ketuai gempung ukai dikuasa perintah (NGO) Dayak ke bukai.

BEJADI…Doris mangkung tawak kelai bejadika Panggau BDCF 2019.

Doris mega meransang komuniti Dayak ti bepenau berapi anang sanggu bedagang laban tu ulih nyungkak ekonomi enggau ngulihka belanja besai enti dikereja enggau ati keran.

“Lebuh datai ditu lalu diau bemalam ba hotel, bau rengut pemakai Dayak datai ari taba BDCF nyau asai diau ba rumah panjai lalu tu ngasuh tetenguk.

“Nya kebuah aku andal amat dagang tu deka nerima timbal ti manah,” ku iya nerang.

Ku iya, pemisi BDCF tu mega meri peluang ekonomi ngagai komuniti Dayak bedagangka pemakai enggau ai irup.

“Anang ngetu naka ditu aja, tampung pengangkun enggau penau kita, panjai ke agi singkang ba dagang tu laban pemakai asal kitai ulih dibai jauh agi,” ku iya madah nyemetak.

Ngelansa pasal pengawa ngatur BDCF 2019, iya madahka tu pelasar dikena ngelakuka main asal enggau pesaka asal raban bansa Dayak ba pengawa ngetanka iya ari lenyau diseruyut jeman.

Ku iya, komuniti Dayak patut besaup ngemujurka sebarang pengawa bekaul enggau main asal enggau pesaka iya nadai ngira asal penatai enggau penemu ti bebida ba sekeda pekara.

“Komuniti Dayak kemaya hari patut bisi pengiruh ba pekara raban bansa enggau main asal lalu enda dibalut ngena pekara bukai. Kitai mega enda ulih idup ngatika diri lalu patut idup begempung.

“Ari seati enggau sepenemu baru pengawa kitai deka ngasi dikereja sereta nyapai tuju BDCF baka malam tu,” ku iya nampung.

Iya mega ngansak raban nembiak anang sanggu ngaku diri bansa Dayak sereta enda ninggalka adat enggau main asal ti ditampung ari sida ke tuai menya.

“Enti ukai kitai sapa agi ti deka ngetanka kelai bansa kitai tu. Kena pelasar BDCF tu nyadi pelasar kitai matak mayuh agi rebak biak bela ngaul diri mantaika main asal kitai ngagai bansa bukai,” ku iya meransang.

Donna sebedau nya madahka komiti sida udah ngaga ubah ba atur pengerami sekali tu enggau nerima penyereta ari bala nembiak sekula ngambi bagi ba main asal ba Panggau BDCF.

Kenu ku iya, pengawa tu dikena sida matak rebak biak bisi penaluk enggau pengangkun ngetanka main asal enggau pesaka asal raban bansa Dayak.

Sida tu mega nampung pengawa kitai jemah, ku iya nyimpul.

Suara Sarawak