KOTA SAMARAHAN: Bisi 6,328 iti kes vandalisma perengka guna utiliti enggau telekomunikasyen di Sarawak direkod ari 2023 ngagai suku kedua 2026 ti ngujungka pengerugi dipelabaka manggai RM48.43 juta.
Menteri Utiliti enggau Telekomunikasyen Sarawak, Dato Sri Julaihi Narawi madah, penyalah nya bela nanggul servis kelimpah begunaka ungkus besai dikena nganti enggau ngadu.
“Ukai semina nya, pengawa ngadu mega bekenaka jam enggau pengelama ti bela ngeruga pemanah nama agensi utiliti enggau telekomunikasyen,” pia ku iya.
Iya nerangka pekara nya maya Pengerami Bejadi Program Nyeliah Vandalisma Perengka Guna Utiliti enggau Telekkomunikasyen 2026 Renggat Sitak Samarahan ditu, Hari Tiga.
Dato Sri Julaihi madah, Sitak Samarahan aja ngerikod 308 iti kes ba timpuh ke sebaka lalu dipelabaka napi pengerugi manggai RM1.54 juta.
Tu nyengkaum ngenyati loji ai, meter enggau pala paip ai, transformer, kabel karan, lampu jalai sereta ke bukai.
Lalu ba sektor telekomunikasyen, aset ke suah agi dikereja baka stesyen pemachar ba tiang telekomunikasyen, bateri enggau kabel.
Dato Sri Julaihi madah, pengawa ngemunaska vandalisma disungkakka agi nengah Ops Lusuh ari Polis Diraja Malaysia begulai enggau agensi bekaul dikena matau premis barang ke udah dikena lalu mutar penyalah nyual kereban ke dichuri. — EDISI UKAS
