KUCHING: Penyampau turu belanja Perbadanan Usahawan Nasional Berhad (PUNB) nyadi RM500 juta ba Bajet 2027 disadang ngerandang mayuh agi peluang ungkup raban orang dagang Bumiputera Sarawak ngerembaika agi dagang sida.
Sapit Premier Sarawak, Datuk Amar Awang Tengah Ali Hasan madah, penyampau nya bela dikeandal ulih ngenegapka agi pengulih kompeni menua tu beambi ulih ari peluang ke numbuh ari pemeranak puku sereta pemansang industri di nengeri tu.
Ku iya, PUNB udah ngagihka RM121.2 juta ngagai urung 354 kompeni di Sarawak naka 3 September 2026.
“Penyampau tu dikearapka kitai ulih ngerembaika agi akses bantu belanja ngagai orang dagang Bumiputera nyengkaum di Sarawak,” pia ku iya.
Iya nerangka pekara nya maya Program Kaul Orang Dagang Nengeri Sarawak 2026 ditu, Hari Tiga.
Ba pekara bekaul, ku iya, penumbuh dagang mikro, mit enggau jelan pemesai (PKMS) beguna dikena nyukung juluk ati bulih Asil Kasar Dalam Menua (KDNK) manggai RM282 bilion ba taun 2030 nengah Pelin Pemansang Udah COVID-19 2030 (PCDS 2030).
Menteri Dagang Antarabansa, Industri enggau Pemeranak Puku Sarawak nya mega madah, nengeri tu bisi urung 71,000 PMKS alai nyauka 80 peratus endang dagang mit lalu saup ngagai KDNK nengeri disadang datai 18 peratus.
Awak nya bela dikena iya meransang PUNB ngerembaika kerejasama enggau Sarawak Energy Berhad (SEB), Petroleum Sarawak Berhad (PETROS) sereta kompeni bekaul dikena nempa mayuh agi peluang ngagai vendor menua tu lebih agi ba sektor energi, teknologi moden enggau infrastruktur utiliti. — EDISI UKAS
