KUCHING: Gabungan Parti Sarawak (GPS) deka bediri ba semua 82 iti penuduk Kunsil Nengeri (DUN) Sarawak ba Pengawa Bepilih Nengeri (PRN) Ke-13.
Chairman GPS ke mega Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pekara nya diputus ba Aum Kaunsil Besai GPS ke digulu presiden parti komponen, Hari Tiga.
Ku iya, GPS diatu nyikap diri napi pengawa bepilih nya lalu ke diatu agi nganti Komiti Pengawa Bepilih (SPR) nentuka hari bulan.
“Siti pekara ke ulih dipadahka aku iya nya GPS deka bediri ba semua 82 iti penuduk. Tu pemutus kitai.
“Ba pekara bukai, kitai nganti pemutus ari SPR bekaul kemaya bepilih lalu udah nya kitai deka ngatur singkang ke patut,” pia ku iya.
Iya bejaku munyi nya maya dirandau media sepengudah betuaika Aum Kaunsil Besai GPS ba Indu Opis Parti Pesaka Bumiputera Bersatu (PBB) ditu, Hari Tiga.
Bekaul pengawa komponen GPS bedua penuduk, ku iya, pekara nya deka diperati silik nyengkaum ngira chalun ke menang ba penuduk maya pengawa bepilih sebedau tu.
Iya madah, rintai nama chalun GPS deka diputus sebedau hari ngantung nama, sepengudah SPR netapka hari bulan.
Empat parti komponen GPS iya nya PBB, Parti Sa’ati Rayat Sarawak (SUPP), Parti Rayat Sarawak (PRS) enggau Parti Demokratik Progresif (PDP).
Ba PRN Ke-12, GPS menang 76 ari 82 penuduk DUN Sarawak alai PBB menang 47 penuduk, SUPP (13), PRS (11) enggau PDP (lima).
Penyampau penuduk udah nya nambah nyadi 79 ba taun 2024 bepun ari Parti Sarawak Bersatu (PBB) direrak alai tiga Kaban Kunsil Nengeri (ADUN) parti nya tama PDP.
Kelimpah ari nya, pemutus ADUN Batu Lintang, See Chee How nyukung GPS, nambah penuduk nyadi 80 lalu dua iti penuduk dipegai Parti Tindakan Demokratik (DAP). — EDISI UKAS
