BA rampa menua ti gadung, siti homestay bediri reregah bepelasarka rampa menua.

Ditu mih mimpi enggau juluk siku pengereja pengawa perintah ti udah pinchin nyadi nyata lebuh iya nirika Datah Belti Lodge, Sungai Asap, Belaga di tengah kampung puang.

Pengempu palan nya, Matthew Ngo Awing, 66, ukai orang baru ba dunya servis mensia mayuh.

Sebedau pinchin, iya kala nyadi sekretari peribit Sapit Menteri Utiliti.

Nyadi siku orang gawa perintah, pengidup iya sebedau tu penuh enggau pengawa opis sereta tanggungpengawa bukai di mengeri.

Taja pia, pengudah pinchin, iya milih pulai ke rampa menua enggau tanah pesaka sida sebilik.

Matthew bisi tiga anak enggau empat uchu ti ngasuh pengidup iya besai reti enggau penatai orang baru dalam ruang bilik.

Penemu deka ngemansang homestay tu lebuh keterubah iya datai ngagai kandang menua nya enggau niat deka nanam sawit.

“Palan tu kebendar suba endur palan nyimpan barang lama niang apai aku, laban iya kala nanam lada ditu.

Tanah tu ngembuan reti sentimental laban kala endur kami sebilik bekebun.

“Lebuh pandemik COVID-19 nuntung, gaya pendiau kami ba rumah panjai balat dikeruga, enti siku kena kes positif COVID-19, lalu sekayu rumah panjai nya deka dijaga nengah Atur Mindah Betagang (PKP)” ku iya lebuh dirandau Suara Sarawak.

Nya alai, ku Matthew, dikena nyeliah pengawa iya tejanggal sereta ngurangka risiko dirampit igi penyakit nya, iya lalu ngaga pemutus diau ba langkau kebun ti ngujungka iya ngepun pengidup kediri di kampung puang.

“Sekumbang diau dia, aku meda mayuh amat kayu ti ulih dikena ngaga rumah.

Penemu deka ngaga palan endur diau tauka homestay ti mit datai ba runding aku nyadi pemungkal

“Tiga bilik keterubah digaga aku ba atas dulu, tang enda memukai, penatai mensia nyau majak mayuh laban sida tekait ati meda pengelain rampa menua ti bisi ditu” ku iya.

Belabuh ari nya, bala pengusung ti udah diau dia berengkah bekunsi peneleba sida enggau bala bakih.

Nengah jaku ari mulut ke mulut, homestay iya nya majak dikelala.

Peminta ti majak nambah ngujungka bilik dia enda chukup agi.

Pekara tu ngujungka Matthew ngerembaika agi dagang iya enggau ngaga mayuh agi bilik endur bemalam.

“Ba sitak nyin, nama bilik diberi aku enggau nama Nah B.

Nama nya diambi aku ari nama sungai lama kami suba, tang diatu sungai udah tenggelam bekau ari perintah ngaga Tekat Ai Bakun.

“Sungai nya kala besepiak enggau rumah panjai asal kami suba iya nya Rumah Belor di Batang Baloi tang diatu genturung nya udah nadai agi laban udah tenggelam ketegal Tekat Ai Bakun,” ku iya.

Taja pen palan pengentap pendiau lama udah berubah, tang pengingat enggau sejarah iya mengkang idup nengah nama ti dikena ba homestay ti didirika iya empu.

Ku iya, ari pasar Belaga, pejalai ngagai homestay tu diatu begunaka awak urung sejam setengah laban jalai alun udah manah.

Tang enti ari Bintulu, penyauh pejalai kia urung dua jam bepanggai ba gaya deriba.

“Promosyen homestay tu mayuh digaga aku tang tebal agi bepanggai ba penguna ti kala diau ditu dulu suba.

“Tebal agi, temuai nemu pasal nya nengah kunsi bala kaban ti udah diau ditu.

Kelimpah ari nya, aku mega bisi ngadu promosyen nengah Facebook enggau Google,” ku iya.

Ku Matthew, bala orang ti kala diau dia tebal agi datai asil ari cherita sida ti udah kala ngasai ke peneleba nya.

“Ari sukut perengkaguna pemun, homestay aku disikap bekal ai, kuasa karan enggau arus penyambung.

“Tikas arus internet udah ngemantupka ati ditu, taja pen kekadang lebuh musin pengerami mayuh orang pulai ke rumah panjai bisi lubah mimit.

“Diatu, homestay aku bisi 10 iti bilik ungkup bala pengusung, taja pia, lebuh udah penuh, peminta orang ti deka diau tu nyau ditulak aku,” ku iya.

Berindik ari nya, Matthew ngarapka diri ulih nambahka agi bilik homestay iya dudi hari

Homestay tu mega udah nurai pemujur ke alai ba taun 2023, palan tu udah ngari ke menua tu lalu ngulu Program Homestay Standard Asia.

“Aku empu bisi datai nerima setipikit enggau trofi ari Opis Menteri Dagang Temuai Malaysia dikena ngaku tikas penyulut ti udah dijapai tu,” ku iya temegah ati.

Kelimpah ari bilik endur diau, palan nya bisi nyendia bemacham perengkaguna bukai.

Sekeda nya palan manggang ungkup temuai ti deka belelak enggau diri sebilik sereta bala bakih.

“Nuju bala ti rindu beperindang, aku mega bisi nyendia PS portable dikena temuai belagu merindang ati enggau pangan diri.

“Perengkaguna tu suah nyadi pilih temuai ti deka ngisi malam enggau gaya ti ngelantangka ati.

“Pegung nyemerai mega digaga aku khas ungkup nembiak mit laban lebuh meda mayuh apai indai mai anak mit ti ngadu aktiviti maya kemisi” ku iya.

Kelimpah ari nya, ba ujung kandang endur nya, iya mega bisi nyendia servis bekayuh perau ungkup temuai ti deka ngasai ke peneleba semak enggau rampa menua.

“Bisi temuai antarabansa kala diau ditu, nyengkaum ari Eropah, New Zealand enggau China.

“Sulu jaku homestay tu nyengala ngulihka kitai besambung enggau rampa menua.

“Bunyi sungai, bunyi burung enggau rampa menua ti gadung nyadi pengelantang ngagai sida ti ngiga pemaik.

Nuju orang ti rindu ke rampa menua enggau sida ti deka ‘sumanʼ jauh ari penyekut mengeri, homestay tu meri peneleba ti nyata, tulin sereta ngelantang atio.

Ditu mih kitai ngeleda ke pemesai guna rampa menua nyadi bakih, lalu pengingat lama ti majak idup lebuh kitai diau ba menua pesisir.

Nuju kita ti deka ngasai ke peneleba tu, kita tau telefon ngagai Matthew empu ba lumur 019-8880291.