KOTA SAMARAHAN: Pelanda ari Kenya, Dennis Isika mujur madam rikod dipegai Andy Yeo ba taun nyin kemari ba HSL Samarahan Marathon 2026.

Dennis bepekit ba kategori lelaki veteran setengan maraton ba timpuh sejam 16 minit enggau 28 sikin lalu gelar champion kategori indu veteran dipenggi Abigael Jerop ti bela ari Kenya ba timpuh sejam 27 minit enggau 26 sikin.

Champion kategori lelaki tebuka setengan maraton iya nya Syahrullah Safri enggau timpuh sejam 16 minit enggau 31 sikin lalu kategori indu dipenggi Jia Qi Chew ba timpuh sejam 33 minit enggau 32 sikin.

Atlit dipelanja HSL nyengkaum Sally Yap sereta kaban Tim Haolin bela mandang gaya nyulut lebuh bulih 13 penuduk kategori 10 pemadu manah ungkup bemacham kategori.

Seraya nya, Anugerah Kostum Pemadu Manah dipenggi Joyce Nyupeh nengah kostum rabbit Halloween kelimpah Adrian Harun enggau Voon Kim Choon.

Menteri Nembiak, Lumba enggau Pemansang Orang Dagang, Datuk Seri Abdul Karim Rahman Hamzah dibasa nyua perais ngagai bala pemenang.

Iya madah, taja pen HSL enda ngatur program maraton penuh berindik ari pengawa ngaga jalai ba endur nya tang program nya lanchar.

“Program setengan maraton ti diatur tu lanchar sereta nerima timbal ngemantup ati ari bala penyereta dalam nengeri enggau menua luar.

“Aku ulih meda mayuh pemenang sehari tu (kemari) ukai datai ari Kuching tauka Sarawak aja tang ngaul penyereta ari Semenanjung Malaysia, Afrika enggau mayuh bagi menua di Sarawak.

“Tu siti program ti chukup manah ke pengerai tubuh enggau runding,” ku iya.

Karim bejaku munyi nya pengudah bejadi pengawa nyua perais ngagai bala pemenang HSL Samarahan Marathon ba indu opis Hock Seng Lee Berhad ditu, kemari.

Iya meri terima kasih ngagai raban pengatur HSL, pengatur begulai sereta bala pemelanja berindik ari komitmen sida nampung sereta ngemujur program nya.

Lebuh dirandau, champion kategori indu veteran, Abigael madah, iya udah nyikap diri pengelama tiga bulan ungkup

program nya sereta champion ba kategori dipasuk iya.

“Bala atlit Malaysia diatu majak kering enggau besemekih. Nya alai, aku ngasai ba taun baru deka besai agi semekih,” ku iya.

Iya bela muji arung belanda ba pekit nya chukup engkeman laban landau lalu nya jauh bebida ari menua sida ti tebal agi bebukit.

Nangkan nya, champion kategori lelaki veteran, Dennis madah, pengawa ngatur HSL Samarahan Marathon nya sistematik, berurun enggau profesional kelebih agi ari sukut arung belanda, staf marshal enggau stesyen ai.

Ku iya, penatai entukar penyempulang mantu nentuka lumba nya lanchar ari pun nyentuk adan.

“Aku kala ngambi bagi ba program sebaka di Samarahan ba taun nyin kemari ungkup kategori 10 kilometer tang ba taun tu, aku ngaga selinting ti besai agi.

“Aku semampai datai enggau siti tuju iya nya deka champion laban tetiap latih ti dipejalaika aku ninting hari nempa aku manah agi,” ku iya.

Iya mega ngembuan juluk deka datai baru ke Kuching nyadi siku ari penyereta Kuching Marathon dudi hari ungkup kategori maraton penuh kelimpah nyelinting gelar champion.