KUCHING: Projek ngaga Sekula Sekondari (SMK) Balingian ti dikategori projek tejanggal enda tau enda diberi perati sereta dirumban dikena nentuka perengkaguna pelajar ulih tembu menyana.
Kaban Kunsil Nengeri (ADUN) Balingian, Dr. Abdul Yakub Arbi madah, ejensi bejalaika pengawa ke bekaul meseti bejalaika atur ke patut dikena nentuka projek nya bejalai enggau lanchar.
Iya madah munyi nya lebuh bejuraika Rang Undang-undang Belanja (2027), 2026 ba Aum Kedua Penggal Kelima Kunsil Nengeri (DUN) Sarawak Ke-19, kemari.
“Aku minta projek ngaga SMK Balingian ti dikategorika projek tejanggal deka diberi perati ngambi digaga baru enggau jampat,” ku iya.
Abdul Yakub madahka taga projek meseti ditetap dikena nentuka pejalai projek nya ulih dipatau rat.
Iya ngarapka ejensi ti bejalaika pengawa ulih netapka pelin ti berurun dikena nyeliahka projek nya ari majak laun tembu.
Ku iya, pengawa nembuka projek nya beguna dikena nentuka pengawa ngaga iya ulih tembu nitihka timpuh ke udah ditetapka.
Abdul Yakub mega ngarapka raban ke bekaul beratika isu tu enggau berat nentuka projek ngaga SMK Balingian ulih tembu sereta enda tejanggal kelalu lama.
