KUCHING: Direktor Pemansik Tanah Kerapa Tropika Sarawak (Tropi), Datuk Dr Lulie Melling udah nerima anugerah felo Akademi Sains Malaysia (ASM) kelai penyulut ba pekara Sains Biologi, Betanam Betupi enggau Rampa Menua di Malaysia.
Iya mega entara 35 saintis, injinir enggau pakar teknologi tebilang ba Malaysia ti diberi basa nerima anugerah nya ba Pengawa Nyuaka Anugerah Felo Akademi Sains Malaysia enggau Diaku Top Research Scientists Malaysia 2023 di Kuala Lumpur, malam Hari Dua tu tadi.
Setipikit ASM nya entara pengawa ngaku pemadu tebilang di Malaysia ba pekara sains enggau teknologi diberi ngagai Dr Lulie udah disua Menteri Sains, Teknologi enggau Inovasyen, Chang Lih Kang ngarika Menteri Besai, Datuk Seri Anwar Ibrahim.
Nangkan nya, Dr Lulie mega rayat Sarawak kedua dipilih nyadi felo dalam sejarah ASM ke alai kepenudi nya 25 taun ke udah mangku pengawa nyadi Direktor Tropi kenyau ari taun 2016 kelimpah meri servis sanding penemu teknikal enggau perunding ngagai Perintah Sarawak enggau organisasyen antarabansa.
Iya ke mega pakar dalam Ekosistem Tanah Kerapa Tropika, Fluks Gas Rumah Gadung sereta Atur Agro-Rampa Menua Tanah Kerapa Tropika entara 846 penerima darjah kebesaran, bintang enggau pingat serimbai Pengawa Ngintu Hari Pengada Ke-86 Tuai Pemegai Menua (TYT) Sarawak, Tun Abdul Taib Mahmud, taun nyin tadi.
Iya diberi pangkat Darjah Jasa Bakti Sarawak (DJBS) ti mai gelar Datuk.
Jasa besai Dr Lulie nyengkaum pengawa numbuhka repositori dunya ungkup pansik tanah kerapa tropika ti meri pemaik ukai semina ngagai Sarawak tang mega dunya.
Pemujur iya mungkal bejalaika pansik tanah kerapa udah ngangkat siti ari pemansut ekonomi besai di Sarawak enggau Malaysia.
