Dua bakal, lori ngundan sawit eksiden ba Simpang Pusa

SARATOK: Dua iku pekerja nganjung buah sawit ngena lori bakal ba penusah bebadi jalai alun urung pukul 6.30 pagi tadi.

Lori ke sarat ngundan buah sawit 10 tan nya eksiden ke diri empu maya nengah siti tiku jalai semak Simpang Pusa, Jalai Saratok-Betong ditu.

Ketuai Balai Bomba Saratok PPgB Nazry Mohamat madah, piak Palan Pengatur Operasyen (PGO) nerima kangau ngenyit urung pukul 6.48 pagi laku terus ngesah palan nya.

“Lebuh datai ba palan penusah piak bomba meda deriba lori agi tepekul.

“Siku agi orang ke bebadi iya nya pemantu deriba lori nya udah mujur mansutka diri empu ari lori ke udah tumbang.

“Lori ke ngundan sawit nya dalam rantau jalai ari Saratok nuju ke Sri Aman.

” Operasyen tembu urung pukul 7.40 pagi pengudah deriba lori mujur dipansut ngena kereban raban bomba,”ku iya seraya madah operasyen nya dibantu tiga iku polis enggau tiga staf perubat Sepital Saratok.

Nitihka penerang diambi maya penusah nyadi, tudah ke dituntung penusah bebadi tu iya nya Alen Peter Paran (deriba lori) , 34 asal ari Nanga Mepi, Lubok Antu enggau pemantu iya Atin Entuni, 28 asal ari Bawang Assan, Sibu.

Seduai bela udah dianjung berubat ngagai Sepital Saratok.

TEPEKUL…Raban bomba benung ngemansutka tudah deriba ke benung tepekul.

Suara Sarawak