KUCHING: Opis Pengerai Nengeri ngenukuka dua kluster Covid-19 punas sehari tu iya nya Kluster Jelita di Miri enggau Kluster Indah Riang di Kuching pengudah nadai ngerikodka kes positif Covid-19 baru dalam timpuh 14 hari.
Komiti Penyangga Penusah Ngenyit Nengeri (JPBN) dalam siti penerang media sehari tu taja pia madahka dua agi kluster baru nambah iya nya Kluster Kiba enggau Kluster Jalai Awang di Sibu.
Kluster Kiba siti kluster komuniti ti ngaul sebuah rumah panjai di Ulu Durin Kiba di Sibu.
Kluster tu datai ari kes indeks ke-9,790 siku indu beumur 53 taun ti ditemu ngembuan tanda dirampit kena 24 Februari ngagai 27 Februari.
Asil pansik ngagai pengawa ngiga orang bekaul enggau iya nunjukka kes positif Covid-19 nambah 32 kes.
Nangkan nya, Kluster Jalai Awang ditemu nyadi ari siku orang ti dijil ba Palan Jil Sibu di Jalai Awang.
Kluster tu ditemu nengah pengawa ngiga kes benung ngerekai (ACD) dalam palan jil ti diatur kena 4 Mac ari Opis Pengerai Bagi Menua Sibu.
Asil peresa nya bisi 42 iku kes positif Covid-19 ditemu ngaul 41 iku lelaki enggau siku indu.
Naka tu, kluster ti agi ngerekai di Sarawak bisi 26 kluster ke alai lapan kulster bisi nambah kemari lalu 18 kluster ke bukai nadai nambah.
