Dua OKU ampit PPR Samarahan II

KOTA SAMARAHAN: Sepenyampau 180 isi bilik matak seput lantang pengudah nerima kunchi rumah PPR Samarahan ll ditu pagi tadi.

Menteri Kaunsil Kandang Menua enggau Pengawa Berumah Datuk Prof Dr Sim Hui Kian madahka 180 buah rumah diungkupka 180 isi bilik nyengkaum dua buah diberi ngagai orang nyelai pendiau (OKU).

“PPR Samarahan ll tu dipelanja Perintah Besai beungkus RM34,821,000 dipejalai Kaunsil Pemansang Rumah (HDC).

“PPR tu endang nyelinting raban bepenatai pemisi enda lebih ari RM3,000 tauka B40,” ku iya.

Dr Sim mansutka jaku nya lebuh nyuaka ‘replika’ kunchi rumah ba sebengkah pengawa diatur ba PPR Samarahan ll.

UNGKUP PENGELANTANG… Dr. Sim (tujuh kanan), Bakrie Zaini (enam kanan) begambar ungkup kenang begulai enggau bala penerima rumah ba PPR Samarahan ll ditu, pagi tadi.

Ku iya, projek rumah tu berengkah dipejalai kena 5 Oktober 2015 lalu udah tembu 21 Februari 2018 taun nyin tadi.

“Rumah tu dijual berega RM50,400 sebuah seraya rumah ba tisi berega RM59,220 sebuah.

“Rumah tu bisi 710 kaki pemesai, tiga bilik tinduk, dua bilik mandi, dapur, endur paking kerita enggau tanah unjung bilik,” ku iya.

Berindik ari raban B40 napi pemar minta jali ba bank ngujungka sida enda tebelika rumah.

“Nya alai, Perintah Sarawak meri bantu jali penyampau RM6.2 juta nengah pakej Mutiara Mortagage & Credit Sdn Bhd ti nyaup sida ngaduka jali nya.

“Genturung pendiau tu diuwan pupu bansa ke alai 94 ungkup Muslim Bumiputera, 60 Bumiputera, 24 ukai Bumiputera lalu dua ungkup OKU,” ku iya.

PPR Samarahan ll tu didiri ba Lot 2077, Blok 2, Samarahan ti semina 10 kilometer ari UiTM Sarawak Kampus Samarahan.

Entara penyikap perengka guna ti bisi disediaka dia baka surau, tadika enggau taman bemain nembiak mit.

Sama datai Mandal Chairman HDC Bakrie Zaini enggau Ketuai Pemesai Eksekutif (CEO) HDC Mohd Asman Ahmad.