Dun Opar nerima geran MRP sepenyampau RM1.2 juta

KUCHING: Bisi 97 geran Projek Mit Pemansang Menua Pesisir (MRP) penyampau RM1.2 juta disua ngagai genturung pendiau enggau gerempung ba sitak Opar.

Chek nya disuaka Menteri Pelajar, Sains enggau Teknologi, Datuk Amar Michael Manyin Jawong ngarika Kepala Menteri Datuk Patinggi Abang Johari Tun Openg kemari ba Kampung Bitokan, Selampit Lundu.

Manyin madahka agih belanja nya kebendar patut disuaka pengari rayat ba sitak nya.

Taja pia, iya madahka Adun Opar, Datuk Ranum Mina nya pengari rayat ari parti penyakal ke alai iya udah diasuh nyuaka agih belanja nya.

“Aku pechayaka geran tu udah lama dianti 58 buah genturung pendiau nyengkaum gerempung ba sitak tu.

“Aku ngangauka raban bansa Dayak meri sukung ngagai Gempung Parti Sarawak (GPS) ngambi Dun tu enda tinggal ari sukut pemansang.

“Aku pechaya, GPS deka ngiring baru Perintah Sarawak maya pengawa bepilih ke deka datai.

“Aku andalka GPS ulih ngerampas baru Dun tu,” ku Manyin nerang.

Manyin mega ngelalau Komiti Pemansang enggau Pengelikun Genturung Pendiau (JKKK) ngerembaika berita pasal pengawa betuchuk vaksin Covid-19 ngagai peranak bukai.

“Program tu mesti dipejalai ba bulan Februari tu tadi tang ditangguh ketegal pengerekai Covid-19 di Lundu.

“Nya tanggung pengawa pengari ditu meransang peranak betuchuk vaksin ngambi nyaup perintah ngembuan komuniti ti tan ngelaban igi penyakit tu.

“Aku ngarapka JKKK deka bejalaika tanggung pengawa sida ngambi ngasuh peranak ditu rejister nerima vaksin Covid-19 nengah MySejahtera,” terang Manyin.

Sama datai Adun Tasik Biru, Datuk Henry Harry Jinep, Adun Serumbu, Miro Simuh, Pegawai Pelilih Lundu, Gustian Durani, Sekretari Politik Charles Chad Nissom enggau John Nyigor sereta Penghulu Longer Mised.

Suara Sarawak