ELISA RACHEAL BRAYON
Suarasarawak.news@gmail.com
KUCHING: Opis Menteri Industri Pemakai, Komiditi enggau Pemansang Wilayah (MFICORD) nengah Kaunsil Pemansang Tanah (SLDB) ulih dichiri nyadi ejensi khas ba pengawa ngaga enggau nyeruri jalai kebun ba selampur Sarawak.
Kaban Kunsil Nengeri (ADUN) Meluan, Rolland Duat Jubin madahka infrastruktur jalai kebun nya siti projek ti meri empas besai ngagai menua pesisir.
Iya madah, tebal agi pekebun ba Meluan agi bedarat urung berapa kilometer penyauh dikena napatka kebun sida.
Nya alai, iya nyukung juluk MFICORD ti deka nyiri SLDB nyadi ejensi khas ti ngemeratka pemansang infrastruktur betanam betupi.
“Aku minta agih belanja khas RM10 juta setaun dikena ngemansang infrastruktur jalai kebun ba Meluan,” ku iya.
Rolland bejaku munyi nya rambau bejuraika jaku Tuai Pemegai Menua (TYT) Nengeri Sarawak, Tun Pehin Sri Dr Wan Junaidi Tuanku Jaafar rambau DUN Ke-19 ba Kompleks DUN Sarawak ditu, kemari.
Iya mega ngemeratka pemansang nembiak enggau lumba ba Meluan laban Julau ngembuan mayuh atlit ti ngarika Sarawak enggau Malaysia.
“Aku minta sebuah sekula iya nya Sekula Sekondari (SMK) Julau enggau SMK Julau 2 diberi perati tauka diaku nyadi sekula lumba laban mujur nempa mayuh atlit ti ulih besemekih ba renggat ti tinggi.
“Berebak enggau nya, aku merambu Stadium Julau ti endang udah bisi disikap ngena fasiliti ti meruan agi baka gimnasium enggau fasiliti lumba ti bukai,” ku iya.
