KUCHING: Sektor komoditi enggau agropemakai Sarawak majak mandangka pemujur alai penyampau eksport kelapa sawit nambah ngagai RM11.5 bilion ungkup timpuh Januari nyentuk Ogos 2026.

Kelimpah ari nya, industri nupi jani ngasil RM158.75 juta nengah eksport 109,606 iku taun tu.

Menteri Industri Pemakai, Komoditi enggau Pemansang Kandang Menua Sarawak Dato Sri Dr Stephen Rundi Utom madah, penyampau tu mandangka pengulih dua bengkah sektor nya nyaup pengerembai ekonomi nengeri.

“Tu ngelai sektor agropemakai enggau komoditi kitai ba penuduk ke entap.

“Asil eksport minyak sawit ke nambah sereta nyerungkai dagang jani idup ngagai Singapura enggau Selangor ukai semina ngenegapka agi penatai pemisi nengeri tang bela ngelai produk ari Sarawak nipak standard enggau biosekuriti antarabansa ti terit,” pia ku iya.

Iya madah munyi nya maya ngenataika jaku simpul ari opis menteri iya ba Aum Kunsil Nengeri (DUN) Sarawak Ke-19, Hari Dua.

Bekaul industri sawit, Dato Sri Dr Stephen Rundi madah, penyampau eksport ari Januari nyentuk Ogos 2026 bisi 2.6 juta tan metrik, nambah 317,585 tan metrik enti dibanding timpuh ke sebaka taun siti tadi.

Ku iya, penyampau nya nambahka eksport ari RM1.2 bilion ngagai RM11.5 bilion enti dibanding RM10.3 bilion ba timpuh ke sebaka ba taun 2025.

Ba industri jani, Sarawak mega nyulut ba dagang domestik enggau antarabansa bepun ari bekal ti semampai bisi ari Palan Nupi Jani (PFA) Pasir Puteh.

Ku iya, palan nya eksport urung 2,500 iku jani idup seminggu ngagai Singapura kenyau ari 2017.

“Kelimpah ari nya, Sarawak mega nganjung 500 jani idup seminggu ke Selangor ari taun 2025,” ku iya madah baru.

Ba pengawa nyungkak kapasiti asil sereta ngenegap tikas biosekuriti, Perintah Sarawak benung ngaga Palan Nupi Jani (PFA) Selangau ke beungkus RM200 juta enggau Ladang Jani Moden (MPF) Ensengei di Serian beungkus RM385 juta.

Dua bengkah projek nya deka nyaup Sarawak nambah penyampau jani ninting taun nyadi 860,000 iku ti ngasil RM1.5 bilion ba taun 2030. — EDISI UKAS