Enam bulan mutar penanggul jalai sekut

KUCHING: Penanggul jalai sekut sepemanjai Jalai Batu 9 ngagai Jalai Batu 10 deka diputar kandang enam bulan agi.

Adun Batu Kitang ti mega Chairman Majlis Perbandaran Padawan (MPP) Lo Khere Chiang madahka iya nerima mayuh kompelin pasal jalai alun ti kelalu sekut dia.

“Asil randau kami begulai enggau raban Lebuhraya Borneo Utara (LBU), raban Opis Kereja Raya (JKR) enggau raban bekaul, kami teulihka runding ngena sebengkah chara ti dikearapka ulih mutarka penanggul tu.

“Maya jam mensia mayuh nurun enggau pulai gawa entara pukul 7.00 pagi ngagai 8.30 pagi enggau pukul 4.00 lemai ngagai 7.00 lemai, jalai alun diberi awak ngena dua lurung lalu bala konteriktor nadai tau ngereja pengawa maya jam nya,” ku iya.

Khere Chiang bejaku munyi nya lebuh aum pemberita di CS Food Street ditu tadi.

Iya nerang, projek ngaga jalai nya berengkah dipejalai kenyau ari dua taun ke udah.

Suara Sarawak