LUNDU: Pemansang dagang temuai Parlimen Santubong deka diatur dipelasaraka enam pugu besai mungkur infrastruktur, modal mensia, penumbuh sosioekonomi, pengelantang komuniti, raban nembiak enggau pengawa nyadi volunteer sereta pemansang semangat enggau ulah ti manah.

Menteri Pemansang Indu, Ruang Bilik enggau Komuniti, Datuk Seri Nancy Shukri madah, enam bengkah chara tu beguna dikena nyikap komuniti ba kandang menua tu mungkur menua Telok Melano, Sematan, Lundu, Santubong, Damai, Buntal enggau Bako nyentuk Muara Tebas.

“Perambu kitai meseti komprehensif sereta nitih ke peminta tiap kandang endur kelebih agi ari sukut infrastruktur enggau penyedia sosioekonomi, sebedau peluang diambi ba endur bukai.

“Tu beguna laban kitai deka nentuka semua pemansang nya dikenatai, dipejalaikasereta dijapai,” ku iya.

Nancy bejaku munyi nya rambau program nutup Regata Lundu Sungai Batang Kayan ditu, kemari.

Program nutup regata nya mujur dipenyadika Premier Sarawak, Datuk Patinggi Tan Sri Abang Johari Tun Openg.

Ku iya, komuniti patut nyikap diri sebedau pemansang datai ba kandang menua sida, kelebih agi beratika pengulih ti bedau diguna dia ke patut dikemansang berengkah ari diatu.

“Kebendar aku udah meda sekeda palan ditu ngembuan peluang ti manah ngerembai baka rumah temuai (homestay).

“Nya alai, sida patut disedia enggau kus ti engkeman dikena meri penemu enggau peneleba sereta nyikap sida ngagai sektor dagang temuai.

“Sida mega tau diberi kus bukai baka belajarka pengawa dagang, penau gawa enggau program pemansang dikena nambahka ekonomi enggau pun penatai pemisi ruang bilik,” ku iya.

Iya madah, nengah pengerembai tu, peranak dia ulih nempа ekosistem ti meruan lalu ngubah landskap Santubong nyadi palan ekonomi enggau dagang temuai ti manah.