SARATOK: Pengawa nyeleti fasiliti lumba enggau rekreasyen entara rintai projek ti enda kala dikelaung ninting taun.
ADUN Kalaka, Mohamad Duri madah, lumba nyadi ejen ngempung semua pupu bansa pemadu besai.
Nya alai, ku iya, inisiatif numbuhka fasiliti lumba enggau rekreasyen ti lantang endang seruran dikemerat.
“Ninting taun, bisi projek ungkup pekara tu laban ulih meransang komuniti ngaul pengawa lumba kelimpah ngedut pemanah kaul enggau pangan diri,” ku iya.
Mohamad Duri mansutka jaku nya rambau ditanya senentang pengawa ngemendar agih belanja RM100,000 ba baruh Program Transformasyen Menua Pesisir (RTP) dikena nyeleti gelanggang tenis ba Jalai Roban Lama ditu, tadi.
Terang iya, komuniti patut bisi tanggungpengawa ngagai fasiliti lumba disediaka perintah.
“Ulah ti bisi tanggungpengawa tu beguna amat ngambi kitai enda ngerusak fasiliti ti udah digaga enggau disedia perintah.
“Enda ngereja pengawa ngerusak barang tauka fasiliti tang dijaga enggau manah baka barang kitai empu ngambi ulih dikena ba timpuh panjai,” ku iya.
Iya mega madah, pengawa nyeleti gelanggang tenis ba Jalai Roban Lama deka dipejalai DE Dian Enterprise.
