SINGAPORE: Program Pemandang Dagang Pemakai enggau Ai sereta Hotel Pemadu Besai Asia, (FHA-F&B) 2025 ti diatur di Singapore engkeman amat dikena mandang enggau ngelaku produk pemakai Malaysia nyengkaum ari Sarawak.
Penyanding Penemu Opis Menteri Dagang Antarabansa, Industri enggau Beranak Puku Sarawak (MINTRED), Datuk Seri Mohd Naroden Majais madah, nengah program nya, produk Sarawak ulih dieksport ngagai menua luar baka Eropah, Arab Saudi enggau ti bukai.
“Pia mega, pemandang FHA-F&B di Singapore tu siti pelasar pemadu manah ungkup Sarawak ngelaku produk sida ngagai makit dunya.
“Kebuah pia laban Singapore siti ari pintu penama pemadu strategik di Asia Tenggara dikena ngelaku produk ari Malaysia kelebih agi Sarawak di rantau tu nyengkaum Arab Saudi enggau Eropah.
“Nengah penyampau peranak Singapore ti manggai empat juta iku, tu nyendia makit ti besai agi dikena ngelaku produk ari Sarawak,” ku iya.
Naroden mansutka jaku nya rambau dirandau pemberita pengudah ngabas reruai Sarawak Pavilion di Singapore Expo ditu, kemari.
Bisi 19 pedagang Sarawak ngambi bagi ba program pemandang nya dikena ngelaku produk sida.
Nya nyengkaum produk sarang burung ti udah diinjin, kupi, teh kemiding, lada burak enggau chelum, pes laksa Sarawak, ikan empurau enggau mayuh agi ti bukai.
