MIRI: Opis Menteri Dagang Dalam Menua enggau Kos Pengidup (KPDN) Pampang Miri bedau nerima ripot bekaul pedaja ti nyual pemakai ditanak baru baka ti dikemegau ba media rama.
Tuai KPDN Pampang Miri, Joe Azmi Jamil madah, enti pekara nya nyadi, mensia mayuh ulih ngaga ripot rasmi nengah chara ti engkeman ngagai KPDN.
“Naka diatu, kami bedau nerima ripot tang pengawa matau udah dipejalai lalu gerah udah diberi ngagai pedaja ti nadai ngelekat tanda rega,” ku iya lebuh dirandau pemberita, kemari.
Ku iya, bisi enam pegawai enggau raban KPDN udah bejalaika pengawa meresa nengah Ops Pantau-Bazar Ramadan ba Permyjaya ensanus ngambi bala pedaja ngasika atur.
Bisi 34 bansal dibuka ba palan bedaja Bazar Ramadan Permyjaya ti nyual bemacham pemakai enggau ai irup ngagai bala pengusung.
“Asil ari pengawa matau ngagai pengawa ngeletak tanda rega pemakai enggau ai irup tu endang tampak sereta muntang dipeda bala penguna.
“Kami mega udah meri gerah ngagai bala pedaja pemakai enggau ai irup ngambi seruran mantaika tanda rega ti muntang dipeda bala penguna,” ku iya.
Pia mega, bisi sekeda buah penemu ari mensia mayuh bekaul pengawa nyual baru pemakai ti enda laku dikemegau ba sebelah media rama ba sebengkah bazar Ramadan ditu.
Taja pia, pekara nya nadai temu pengamat laban KPDN nadai nerima sebarang ripot rasmi bekaul pekara nya.
Petenah nya ukai semina ngamahka nama pedaja tang ulih ngasuh pemakai enggau ai irup dijual sida enda laku enggau napi pengerugi.
Penguna ulih ngena hak sida nyadi penguna ngaga ripot rasmi nengah chara ti engkeman lalu ukai bekunsi pekara nya sebelah media rama.
