Genap ripot diterima patut diputar, ku Maszlee

NILAI: Menteri Pelajar Dr Maszlee Malik minta semua staf opis menteri nya nentuka genap ripot diterima patut diputar manah nentuka semua penanggul nya teputar.

Ku iya, semua staf mega patut nyadi ejen rama ti besaup gawa ngemansangka komuniti dikena nempa KPM sebuah opis menteri ti seruran siruka pekara komuniti.

“KPM patut begulai gawa nentuka semua polisi, program enggau aktiviti diperambu ba renggat opis menteri ulih lanchar dipejalai dataika renggat pejalai di baruh.

“Nama guna enti kitai merambu bemacham pekara tang enda meri sebarang pangka manah ngagai raban diselinting,” ku iya lebuh bejaku ba Pengawa Nyuaka Anugerah Servis Nyulut (APC) KPM Taun 2018 ditu, tadi.

Sama datai Menteri Pelajar Malaysia Teo Nie Ching enggau Ketuai Sekretari KPM Datuk Dr Mohd Ghazali Abas.

Dr Maszlee Malik

Ku Maszlee, APC taun tu berambaika jaku Servis Nyulut, Integriti Diangkat setipak enggau polisi perintah ke diatu ti ukai semina ngemeratka kereja enggau servis nyulut aja, tang mega ngangkatka integriti dikena nempa asil ti lurus enggau enda dibalut sebarang pengawa ti salah.

“Siti ari pekara dikemerat menua iya nya nentuka integriti enggau pekara nagang makai suap ti nyadi tiang pemun ngagai atur pengawa.

“Nya kebuah maya bejalaika polisi perintah kelebih agi polisi pelajar menua, genap iku kitai enda tau enda meretika rega integriti ti ukai semina ulih nempa penyulut ba servis siku aja, tang dikena nyukat penyulut kesemua servis menua,” ku iya.

Tuju APC KPM Taun 2018 dikena ngerami 731 penerima enggau ngaku sereta ngenang jasa raban opis menteri datai ari indu opis, Opis Pelajar Tinggi, Opis Pelajar Politeknik enggau Kolej Komuniti sereta PERMATA ti udah ngenataika servis nyulut kelimpah nyadi ejen ti gawaka gaya idup sereta nempa asil ti bisi kualiti.

Suara Sarawak