KUCHING: Gempung Parti Sarawak (GPS) ngirai chalun biak bediri maya Pengawa Bepilih Nengeri Ke-12 (PRN-12) ke deka diatur enda lama agi.
Pekara nya dipadah Chairman iya empu, Datuk Patinggi Tan Sri Abang Johari Tun Openg dikena ngangkatka raban biak dalam parti.
“Sigi amat, kami (GPS) ngirai siku, dua tauka tiga iku chalun biak bediri maya pengawa bepilih ila.
“Pelaba aku, orang biak beumur 30 lebih ngagai 40 taun,” ku Abang Johari bejaku ba Randau Begulai Enggau Unit Komunikasyen Perintah Sarawak (Ukas) ba Palan Aum Besai Borneo Kuching (BCCK), tadi.
Ku Presiden Parti Pesaka Bumiputera Bersatu (PBB) nya, ketuai baru endang diguna ukai semina ungkup PBB aja tang mega komponen dalam GPS.
Pia mega, iya mega madahka diri deka pinchin dudi hari ila lalu ketuai parti deka ditampung rebak biak.
“Diatu pen aku udah tuai, dudi hari ila aku deka pinchin dalam PBB tauka GPS mesti bisi ketuai baru.
“Au, endang amat diatu kitai (GPS) udah bisi ketuai biak lalu tu timpuh nguji sida sekalika beretan tauka enda ngetuai ila,” ku iya nyemetak madah.
Sebedau tu, Mandal Presiden PBB Datuk Seri Abdul Karim Rahman Hamzah madahka parti nya deka ngirai 20 ngagai 30 peratus chalun baru ti deka bediri maya PRN-12.
Kelimpah ari nya ku iya, genap parti bisi chara kediri empu kelebih agi ngirai chalun baru kelebih agi maya pengawa bepilih.
