KUCHING: Graduet Pelajar enggau Latih Teknikal enggau Vokasional (TVET) di Sarawak patut meda pengelandik ke dikembuan nyadi pemun pejalai ngulihka pengawa ke manah agi lalu ukai ditatak naka gawa teknikal aja.

Premier Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, rebak baru diatu mesti berani gawa renggat profesional baka injinia, menijar korporat, seriris enggau ubah ekonomi sereta penumbuh industri teknologi moden.

“Nya alai, ngagai bala graduet, pemujur dudi hari endang enggi kita laban kami tu udah tuai lalu kita deka nganti kami.

“Bala graduet tau berengkah gawa ba tikas baruh dulu sebedau nyingkang ngagai pengawa ke besai agi baka menijar korporat tauka injinia korporat,” pia ku iya.

Iya nibarka jaku tangkan nya maya Pengerami Konvokesyen Sarawak Skills Ke-28 ditu, Hari Empat.

Iya madah, transformasyen ekonomi Sarawak begunaka rebak baru ke ukai semina ngembuan pengelandik teknikal aja tang bisi pengulih ba pengawa ngatur enggau pemansang industri.

“Aku ngarapka bala graduet diatu deka nempa pemujur lalu mai Sarawak nyadi menua ke pemadu mansang di Malaysia,” ku iya madah baru.

Datuk Patinggi Abang Zohari madah, pemansang teknologi baru baka ‘artificial intelligence’ (AI), robotik enggau energi ulih dikena baru deka ngubah peminta pengawa puang lalu tu deka ngerandang awak ngagai orang gawa menua tu nyungkakka agi tikas diri.

Nya alai, iya madahka pemesai guna nyendia latih ke engkeman sereta senutuk enggau guna industri ngambika bala graduet enda tinggal ari ubah pemansang. — EDISI UKAS