PAKAN: Siku kaban Gerempung Raban Pakan (GRP) Tuai Rumah (TR) Kol Anak Ladong, 82 taun udah nerima bantu ari gerempung nya apin lama ke udah.
Chairman iya, Jerenang Jawa madahka bantu ari gerempung nya udah disua ngagai Robert Slyvester Meling ngarika apai iya apin lama ba sebengkah kedai makai ditu.
“Pengawa betulung baka tu endang sigi dikemeranka kami dalam GRP kenyau ari hari keterubah gerempung tu ditumbuh.
“Tu mega siti ari tuju gerempung tu kelimpah iya ke bukai dikena nyaup peranak ditu ti bisi dituntung penusah.
“GRP naka ulih mantu nitihka pemisi gerempung lebih agi baka Tuai Rumah Kol tu endang kaban gerempung tu empu,” ku iya madah nengah sebengkah penerang.
Nangkan nya ku iya, pengawa tu mega dikena ngedut kaul enggau pangan diri awakka GRP terus nyadi teladan ngagai rebak dudi.
“Terima kasih ngagai semua kaban gerempung ke udah besaup meri bantu dikena ngelempung tating sida TR Kol sebilik,”ku iya.
TR Kol asal ari Wong Balang di Bayong ditu udah mujur beputung ba Sepital Sarikei kena 18 Februari tu tadi.
Ungkup penerang, GRP diatu bisi 212 iku kaban sekumbang udah ditumbuh kenyau 16 November 2016 suba.
