KOTA KINABALU: Kepala Menteri, Datuk Seri Hajiji Noor madah ke penyulut Gempung Rayat Sabah (GRS) ba Pengawa Bepilih Nengeri (PRN) Sabah Ke-17 nya endang penyulut rayat.
Nya alai, iya ti mega Chairman GRS meri terima kasih ngagai semua rayat Sabah ketegal ngelempai pengandal ati ngagai iya ngemudi pengawa ngatur nengeri.
“Penyulut tu diempu semua kita ti pechaya ngagai visyen kami, nyukung inisiatif kami sereta bekunsi juluk enggau kami dikena nempa kuing Sabah ti tampak agi.
“Enggau ati beterima kasih, aku nerima pengandal ati ti dilempai kita ngagai aku enggau bala bakih aku ba GRS dikena ngemudi ke baru pengawa meri servis nyadi pengari rayat kita.
“Sukung tegut rayat enggau pengandal sida ngagai pekara ditegi kami nyadi penyungkak ngagai penyulut tu,” ku iya. Hajiji bejaku munyi nya pengudah tembu angkat sumpah nyadi Kepala Menteri Sabah Ke-17 di Istana Seri Kinabalu ditu, kemari.
Berebak enggau nya, iya meransang semua rayat Sabah begulai ngintu penyulut GRS ba pengawa bepilih nengeri sekali tu ti nyadi pengepun ngagai lambar baru ti penuh enggau juluk nempa kuing nengeri ti manah agi.
Iya madah, kenyau ari pun, komitmen GRS sigi deka mai ubah enggau pemansang nengah agenda pemansang meruan enggau inklusif bepelasarka Kuing Sabah Maju Lantang (SMJ). Kelimpah ari nya, ku iya, GRS keran deka bejalaika pemansang ti besai reti sereta ngaga jematan dikena nyambung lalu ukai nyerara.
“Kitai meruan entap nampung SMJ 2.0 ti meri perati ngagai empat pugu besai iya nya Sabah Dikenulu (Sabah First), Sabah Maju (Sabah Forward), Sabah Lantang (Sabah Prosper) enggau Sabah Begempung (Sabah United),” ku iya nyemetak.
Hajiji madah, komitmen penuh gempung parti lokal Sabah nya endang gawa bebendar negi pengadang enggau aspirasyen semua rayat Sabah.
“Kitai deka begulai napi pemar, ngerebut peluang baru sereta nentu genap sada taja pen mit tetap didinga enggau diaku,” ku iya ti mujur ngetan penuduk Kunsil Nengeri (DUN) Sulaman ungkup penggal kesemilan.
Iya mega deka semua rayat Sabah begulai enggau perintah nengeri terus bekerejasama nyadi bakih kunsi ti aktif nyungkak ngagai pemansang nengeri nengah penegap penyerakup dikena nentu penyulut nya besai reti.
“Ngagai semua raban penyakal, kitai udah begulai sepanjai pengawa bepilih tu, aram mih kita ngedut pemanah kaul sereta merekuhka semangat demokrasi nengah pengawa begempung.
“Aram mih kitai nempa pengandal enggau ransing bekerejasama gawa ke rayat enggau chara ti ngasi ke pemaik Sabah,” ku iya. Hajiji, 70, angkat sumpah ba mua Tuai Pemegai Menua (TYT) Nengeri Sabah, Tun Musa Aman ba program angkat sumpah di Istana Seri Kinabalu ditu urung pukul 3.05 dini hari kemari. – BERNAMA
