Hak besekula dijaga KPM

SARATOK: Opis Menteri Pelajar Malaysia (KPM) seruran bebendar gawa mutarka penanggul nembiak mit nadai surat pengelala ngambika diterima besekula kelebih agi di kandang menua pesisir.

Kaban Parlimen Saratok Ali Biju ngemai pekara tu ngagai Aum Parlimen ke alai iya minta Menteri Pelajar Maszlee Malik nerang pasal akses pelajar ngagai nembiak nadai surat pengelala di Sarawak.

“Rayat kelebih agi di Saratok deka nemu naka ni pengawa dipejalaika opis menteri dikena meransang enggau mantu sida rejista besekula.

“Nitih ku timbal diterima kitai, KPM nengah Surat Pekeliling Ikhtisas (SPI) Bilangan 1 Tahun 2019 kena 11 March 2009: Kemasukan Kanak-Kanak Warganegara Malaysia Tanpa Dokumen ti nerang nerima nembiak mit nadai surat pengelala, iya nya anak ke alai indai tauka apai iya peranak menua besekula ba sekula perintah,” ku Ali madah nyemetak.

Iya mantaika pekara tu ba Aum Parlimen Kedua, Penggal Kedua Parlimen Ke-14 di Kuala Lumpur.

Ali Biju

Nangkan nya, Surat Siaran KPM Bilangan 3 Tahun 2018 kena 15 Januari 2018: Pemohonan Kemasukan Sekolah Murid Bukan Warganegara enggau meri timpuh dua taun ngagai apai indai tauka pengibun ngaduka surat pengelala nembiak mit nya.

Ku Ali, nangkup peminta menteri ngambika rejista nembiak mit ti nadai surat pengelala ke alai indai tauka apai iya peranak menua tu besekula endang juluk kitai.

“Kebuah pia laban genap iku rayat bisi hak ti sama lalu enda tau dichiping kelebih agi ba pekara pelajar laban tu nentuka pengelantang rayat dudi hari.

“Tambah mega, nembiak mit tu deka nyadi rebak baru ti deka nampung pengawa kitai nyadi ketuai menua jemah, nentuka pemujur nyapai status menua maju.

“Nya kebuah kitai ba renggat Perintah Besai ngaul kerejasama rat enggau Opis Pengerejista Bansa (JPN) nyaup bala nembiak sekula perintah enggau sekula bantu perintah rejista pengada sida,” ku iya nerang silik.

Penerang ari KPM madahka nyentuk 3 Mei 2019, Aplikasi Pengkalan Data Murid (APDM) ngerikod penyampau tubuh nembiak nadai surat pengelala ba Parlimen Saratok semina tiga aja, siku nembiak Primari Tiga enggau dua nembiak Pom Tiga.