SERIAN: Hak raban bansa Dayak di Sarawak deka seruran dijaga enggau ditegi ungkup pengelantang rebak diatu enggau dudi hari.
Sapit Premier Sarawak, Datuk Amar Douglas Uggah Embas madah, pengeran nya dibantai nengah bemacham projek pemansang dipejalai ke meri pemaik terus ngagai rayat, lebih agi ba menua pesisir.
Ku iya, Serian udah ngasai pemansang deras kenyau ari sepuluh taun ti udah lalu asil mayuh projek dipejalai ari baruh Ejensi Penyeraris Pemansang Greater Kuching (GKCDA).
“Sepenyampau RM1.5 bilion udah diagih nengah GKCDA dikena bejalaika mayuh projek pemansang ba menua tu.
“Kelimpah ari nya, sitak Kunsil Nengeri (DUN) Bukit Semuja mega nerima agih belanja RM125 juta dikena bejalaika projek pemansang ke meri pemaik ngagai peranak dia,” ku iya.
Uggah nibar ke jaku nya ba mua mayuh rambau Pengerami Ngintu Gawai Dayak 2026 Bukit Semuja di Balai Babuk Salog, Kampung Riih Daso, Hari Satu tu tadi.
Ba sukut pemansang rama enggau pengarap, iya madah ke Unit Pekara Pengarap Bukai (UNIFOR) udah ngagihka belanja RM450 juta ngagai rumah sembiang mayuh pengarap ba selampur Sarawak kenyau ari ditumbuh.
Ari penyampau nya, RM11.3 juta udah diagih dikena melanja projek bekaul rumah sembiang enggau perengkaguna pengarap di menua Bukit Semuja.
Iya mega mantangka jaku ke alai penyerakup enggau kerejasama serap komuniti beguna endar nentuka Sarawak majak maju, lantang enggau tegap dudi hari.
